یو پی: بلاک پرمکھ الیکشن کی نامزدگی کے دوران تشدد، پرینکا نے مودی-یوگی پر کیا حملہ

اتر پردیش میں بلاک پرمکھ الیکشن کی نامزدگی کے دوران پیش آئے تشدد کے واقعات کو لے کر کانگریس جنرل سکریٹری پرینکا گاندھی نے بی جے پی حکومت کو سخت تنقید کا نشانہ بنایا ہے۔ انھوں نے اپنے ٹوئٹر ہینڈل سے تشدد کا ایک ویڈیو شیئر کرتے ہوئے لکھا ہے کہ ’’پی ایم صاحب اور سی ایم صاحب اس کے لیے بھی مبارکباد دیجیے کہ یو پی میں آپ کے کارکنان نے... کتنی جگہ بمبازی، گولی باری، پتھر بازی کی... کتنے لوگوں کا پرچہ لوٹا... کتنے صحافیوں کو پیٹا... کتنی جگہ خواتین سے بدتمیزی کی۔ نظامِ قانون کی آنکھ پر پٹی باندھ کر جمہوریت کا چیر ہرن (عزت سے کھلواڑ) چل رہا ہے۔‘‘

دراصل اتر پردیش میں بلاک پرمکھ الیکشن کے لیے آج نامزدگی کا پرچہ داخل کرنے کا عمل چل رہا تھا اور اسی دوران سیتا پور، بلند شہر و جھانسی میں پرتشدد واقعات سامنے آئے۔ ان علاقوں میں بی جے پی کارکنان کے ذریعہ مبینہ طور پر پتھراؤ، بمباری اور فائرنگ تک کیے جانے کی خبریں سامنے آئی ہیں۔ کچھ میڈیا چینل نے ایسے ویڈیوز بھی چلائے ہیں جن میں بمباری اور فائرنگ کرتے ہوئے لوگ نظر آ رہے ہیں۔ انہی واقعات کے پیش نظر کانگریس جنرل سکریٹری اور یو پی انچارج پرینکا گاندھی نے کہا کہ ریاست میں امن وقانون کا نظام بدتر ہوگیا ہے اور جمہوریت کی دھجیاں اڑائی جارہی ہیں، لیکن انتظامیہ آنکھ پر پٹی باندھے ہوئے ہے۔

پرینکا گاندھی نے اپنے ٹوئٹر ہینڈل پر جو ویڈیو شیئر کیا ہے وہ انتہائی خوفناک نظارہ پیش کر رہا ہے۔ ویڈیو میں پولیس کے سامنے ہی دو گروپوں کے مابین کسی تنازعہ پر سڑک پر گولیاں چل رہی ہیں اور گولیوں کی آواز گونج رہی ہے۔ ویڈیو میں ایک آدمی گولی لگنے کی وجہ سے زمین پر گرا ہوا بھی دکھائی دے رہا ہے۔