لکھنؤ: سیاہ فنگس اور کورونا کے انجیکشن کی کالا بازاری! ڈاکٹر سمیت 6 افراد گرفتار

لکھنؤ: اتر پردیش کی راجدھانی لکھنؤ میں ایک ڈاکٹر اور دیگر پانچ افراد کو بلیک فنگس اور ریمیڈیسیور انجیکشن چوری کرنے اور انہیں مہنگے داموں پر مریضوں کے تیمارداروں کو فروخت کرنے کے الزام میں گرفتار کیا گیا ہے۔ پولیس کمشنر ڈی اے ٹھاکر نے کہا کہ انہیں بدھ کے روز رفاہِ عام کلب کے پاس سے گرفتار کیا گیا۔

ملزمان کے قبضہ سے آٹھ موبائل فون، 16 ہزار روپے نقد، دو موٹرسائیکلیں اور ایک کار کے علاوہ بلیک فنگس کے 28 انجیکشن (لیپوسومل ایمفوٹریسن) اور ریمیڈیسیور کے 18 انجیکشن برآمد کیے گئے۔ ملزمان میں سے وامق حسین رام منوہر لوہیا اسپتال میں ڈاکٹر ہے، جبکہ دیگر الگ الگ اسپتالوں میں کام کرنے والے وارڈ بوائے اور دوسرے لوگ ہیں۔

وامق آر ایم ایل اسپتال کے شعبہ ایمرجنسی میڈیسن میں تعینات تھے۔ جبکہ دیگر ملزمان کے جی ایم یو کا ٹیکنیشین محمد عمران اور کے جی ایم یو کا ہی وارڈ بوائے محمد عارف، جے جی ایم یو کا فارماسسٹ بلبیر سنگھ، فارما فرینچائزی کا مالک محمد رقیب اور اس کا ایک معاون سرجیکل کمپنی میں سیلس مین راجیش سنگھ شامل ہیں۔

اے ڈی سی پی راجیش شریواستو نے کہا کہ پولیس کو اطلاع ملی تھی کہ کچھ لوگ لیپوسومل ایمفوٹیریسن بی اور ریمیڈیسیور انجیکن کو غیر قانون طریقہ سے بیچ رہے ہیں۔