’ڈاکٹر‘ کا انکاؤنٹر کر کے بری پھنسی یوپی پولس، عدالت نے دیا ایف آئی آر کا حکم

لکھنؤ کی ایک عدالت نے قتل کے ملزم کا مبینہ طور پر انکاؤنٹر میں موت کے معاملے میں جانچ اور ایف آئی آر درج کرنے کا حکم دیا ہے۔ چیف جیوڈیشیل مجسٹریٹ سوشیلا کماری نے معاملہ درج کرنے کا حکم دیا۔ غور طلب ہے کہ گرفتاری کے بعد عدالت کے ذریعہ پولس کسٹڈی ریمانڈ میں بھیجنے کے بعد 15 فروری کو گردھاری وشوکرما کی انکاؤنٹر میں موت ہو گئی تھی۔

گردھاری عرف ’ڈاکٹر‘ کو 6 جنوری کو شہر کے بھیڑ بھاڑ والے گومتی نگر علاقہ میں ایک گینگسٹر اجیت سنگھ کو گولی مارنے کے الزام میں گرفتار کیا گیا تھا۔ سی جے ایم سوشیلا کماری نے جمعرات کو گردھاری کی موت کے معاملے میں وکیل سروجیت یادو کی عرضی پر جانچ کا حکم دیا، جنھوں نے پہلے فریق دفاع کے وکیل کی شکل میں گردھاری کی نمائندگی کی تھی۔

عدالت نے کہا کہ ’’سپریم کورٹ کی واضح ہدایت ہے کہ پولس تصادم کے معاملے میں ایک ایف آئی آر درج کی جانی چاہیے اور پورے واقعہ کی صداقت کا پتہ لگانے کے لیے جانچ کی جانی چاہیے۔‘‘ عدالت نے کہا کہ یہ جانچ کا موضوع ہے کہ کیا پولس ٹیم نے اپنی حفاظت کرتے ہوئے گردھاری کو گولی ماری یا ٹیم نے اپنی حفاظت سے متعلق حقوق کا غلط استعمال کیا۔ عدالت نے پولس ڈپٹی کمشنر سنجیو سمن اور وبھوتی کھنڈ کے تھانہ انچارج چندر شیکھر سنگھ کو انکاؤنٹر کے مقام پر موجود رہنے کی بات کو نوٹس میں لیتے ہوئے حکم دیا۔

اپنے حکم میں سی جے ایم نے کہا کہ حالانکہ پولس نے گردھاری کی پولس حراست سے بھاگنے اور پولس پر فائرنگ کرنے کے لیے دو ایف آئی آر درج کی لیکن اس کی موت کے واقعہ کی جانچ کے لیے کوئی ایف آئی آر درج نہیں کی گئی۔ اس سے قبل اپنی درخواست میں وکیل یادو نے الزام لگایا کہ ایس ایچ او چندر شیکھر سنگھ اور دیگر پولس اہلکاروں نے سازش کے تحت گردھاری کو مار ڈالا اور معاملے میں ثبوتوں کو دبانے کے لیے جھوٹے دستاویز تیار کیے۔ یہ سب تب ہوا جب گردھاری خود سی جے ایم کے ذریعہ جاری ایک حکم کی بنیاد پر پولس حراست میں تھا۔