کانگریس کے لیے خوشخبری، الٰہ آباد ہائی کورٹ سے اجے کمار للو کو ملی ضمانت

اتر پردیش کانگریس کے صدر اجے کمار للو کو آخر کار الٰہ آباد ہائی کورٹ سے ضمانت مل ہی گئی۔ اجے کمار للو کی طرف سے ابھشیک منو سنگھوی نے الٰہ آباد ہائی کورٹ میں بحث کی۔ یہ خبر کانگریس کے لیے خوش آئند ہے کیونکہ پارٹی لگاتار ان کی ضمانت کے لیے کوششیں کر رہی تھی۔ قابل ذکر ہے کہ اجے کمار للو کو گزشتہ مہینے اس وقت گرفتار کیا گیا تھا جب وہ مہاجر مزدوروں کے لیے بسیں بھیجے جانے کا مطالبہ کر رہے تھے۔

اجے کمار للو کی گرفتاری کے خلاف گزشتہ ہفتہ کے روز یو پی کے کئی شہروں میں کانگریس کارکنان نے یوگی حکومت کے خلاف احتجاجی مظاہرہ کیا تھا۔ انھوں نے اس دوران کہا تھا کہ یو پی کانگریس صدر اجے کمار للو کو غریبوں، مہاجر مزدوروں کو مدد کرنے کے جرم میں گزشتہ 25 دنوں سے یوگی حکومت نے جیل میں ڈال رکھا ہے۔ کانگریس کارکنان کا یہ بھی کہنا تھا کہ اجے کمار للو کی گرفتاری سیاسی رنجش سے متاثر ہے۔ اس دوران کئی کانگریس کارکنان نے گرفتاری بھی دی تھی۔

واضح رہے کہ کچھ دن پہلے ہی کانگریس جنرل سکریٹری پرینکا گاندھی نے اجے کمار للو کے لیے انصاف کا مطالبہ کرتے ہوئے کہا تھا کہ انصاف ملنے تک پارٹی کی لڑائی جاری رہے گی۔ انھوں نے ایک مضمون اس تعلق سے لکھا تھا جس میں اجے کمار للو کے بارے میں کہا تھا کہ متاثرین کے لیے جدوجہد کرنے کا جذبہ ان کے اندر بھرا ہوا ہے اور وہ اپنے کئی ساتھیوں کی ڈرائنگ روم سیاست سے دور بے باکی کے ساتھ اپنی بات رکھنے والے شخص ہیں۔ پرینکا گاندھی نے یہ بھی لکھا تھا کہ وہ انصاف کے حقدار ہیں اور ان کے ساتھ انصاف ہونا چاہیے۔