یوپی اسمبلی انتخابات: بی جے پی کا منشور جاری، دو ایل پی جی سلنڈر، اسکوٹی اور کسانوں کو مفت بجلی دینے کا وعدہ

لکھنؤ: بھارتیہ جنتا پارٹی نے آج اتر پردیش اسمبلی انتخابات کے لیے اپنا انتخابی منشور جاری کر دیا۔ بی جے پی نے اپنے منشور کا نام ’لوک کلیان سنکلپ پترا 2022‘ رکھا ہے۔ سابق قومی صدر اور مرکزی وزیر داخلہ امت شاہ نے وزیر اعلیٰ یوگی آدتیہ ناتھ کے ہمراہ بی جے پی کا منشور جاری کیا۔ منشور کے ساتھ بی جے پی نے 'کر کے دکھایا ہے' کے نام سے ایک نیا انتخابی گانا بھی لانچ کیا۔ اس میں ’کر کے دکھائے گا، بی جے پی آئے گی‘ لائن بھی موجود ہے۔

بی جے پی کے منشور کے جاری ہونے کے بعد یوگی نے کہا کہ یہ 25 کروڑ لوگوں کی زندگی میں تبدیلی لانے کا منشور ہے۔ انہوں نے کہا، ’’5 سال پہلے بھی ہم نے وزیر اعظم مودی کی قیادت میں عہدہ نامہ (منشور) پیش کیا تھا۔ ان وعدوں کو ہم نے منتر بنا کر، جو کہا تھا وہ کر کے دکھایا۔ آگے جو بولیں گے وہ بھی کر کے دکھائیں گے۔‘‘

یوگی نے کہا کہ اب یوپی میں دھوم دھام کے ساتھ کانوڑ یاترا نکالی جاتی ہے۔ سلامتی اور امن و امان کو بھی بہتر کیا گیا ہے۔ یوگی نے کہا کہ ڈبل انجن والی حکومت میں ہر کسان، غریب، خواتین کو بلا امتیاز فائدہ پہنچانے کی ہر ممکن کوشش کی گئی۔

بی جے پی کے منشور میں کئے گئے وعدے

• کسانوں کو سینچائی کے لیے مفت بجلی

• پانچ ہزار کروڑ کی لاگت سے زرعی سینچائی اسکیم

• پچیس ہزار کروڑ کی سرمایہ کاری کے ساتھ سردار پٹیل ایگری انفراسٹرکچر مشن

• آلو، ٹماٹر، پیاز جیسی تمام فصلوں کی کم از کم قیمت دینے کے لیے ایک ہزار کروڑ روپے

• گنے کے کاشتکاروں کو 14 دنوں کے اندر ادائیگی، تاخیر کی صورت میں سود سمیت ادائیگی

• 6 میگا فوڈ پارک

• نشاد راج بوٹ سبسڈی اسکیم

• مشن پنک ٹوئلٹ کے لیے 1000 کروڑ روپے

• ہر بیوہ اور بے سہارا عورت کو 1500 روپے ماہانہ پنشن

• تین نئی خواتین بٹالین

• تمام عوامی مقامات اور تعلیمی اداروں میں سی سی ٹی وی کیمرے اور 3000 پنک پولیس بوتھ

• یو پی ایس سی سمیت تمام سرکاری ملازمتوں میں خواتین کی تعداد کو دوگنا کریں گے

• ایک کروڑ خواتین کو خود کفیل بنانے کے لیے ایک لاکھ روپے تک، کم ترین شرح پر قرض

• کالج جانے والی ہر خاتون کو مفت اسکوٹی

• کنیا سومنگلا یوجنا 15 ہزار سے بڑھا کر 25 ہزار کر دی گئی۔

• غریب خاندانوں کی بیٹیوں کی شادی کے لیے ایک لاکھ روپے کی مالی امداد

• اجولا کے تمام استفادہ کنندگان کو ہولی اور دیوالی پر 2 مفت ایل پی جی سلنڈر