عآپ کو چندہ دینے کے لیے فرضی کمپنیاں بنانے والے دو ملزمین گرفتار

دہلی پولس نے ایک بڑی کارروائی کرتے ہوئے دو لوگوں کو گرفتار کیا ہے۔ ان دونوں پر الزام ہے کہ انھوں نے عآپ کو چندہ دینے کے لیے فرضی کمپنیاں بنائیں۔ میڈیا ذرائع سے موصول ہو رہی خبروں کے مطابق بوگس کمپنیاں بنانے والے مکیش کمار شرما اور ایک چارٹرڈ اکاؤنٹینٹ سدھانشو بنسل کو پولس نے گرفتار کر کے پوچھ تاچھ شروع کر دی ہے۔ دہلی پولس کی اکونومک آفنسز وِنگ (ای او ڈبلیو) افسران کا کہنا ہے کہ انھیں رجسٹرار آف کمپنی کی طرف سے چار فرضی کمپنیوں کی شکایت ملی تھی جس کے بعد کارروائی کی گئی۔

پولس ذرائع کے مطابق کمپنیوں نے 50 سے 60 لاکھ روپے عآپ کے فنڈ میں بطور چندہ ٹرانسفر کیا تھا۔ ای او ڈبلیو کے افسران کا کہنا ہے کہ ان چاروں فرضی کمپنیوں کے معاملے میں مکیش کمار اور ان کے چارٹرڈ اکاؤنٹینٹ سدھانشو بنسل کو گرفتار کیا گیا ہے۔ ان دونوں نے فرضی دستاویزات کے ذریعہ جن 4 شیل کمپنیوں کو بنایا تھا ان کے نام ہیں گولڈ مائن بلڈکون پرائیویٹ لمیٹڈ، اسکائی لائن میٹل اینڈ الائز پرائیویٹ لمیٹڈ، سَن ویزن ایجنسیز پرائیویٹ لمیٹڈ، اور انفولینس سافٹ ویئر سولیوشنز لمیٹڈ۔

پوچھ تاچھ کے دوران ای او ڈبلیو کو پتہ چلا کہ جن ایڈریس پر کمپنی رجسٹر کرائی گئی تھی وہ موجود ہی نہیں تھے۔ ایف ایس ایل رپورٹ سے پتہ چلا کہ جس دیپک اگروال کے کاغذات لگا کر ڈی آئی این نمبر لیا گیا تھا ان کا دستخط بھی جعلی تھا۔ جانچ کے دوران اس بات کا بھی انکشاف ہوا کہ دیپک اگروال کے جعلی دستاویزات گرفتار چارٹرڈ اکاؤنٹینٹ سدھانشو بنسل کے ذریعہ جمع کرائے گئے تھے۔