ٹی آر پی گھوٹالہ: ممبئی پولیس کے سامنے حاضر نہیں ہوئے ریپبلک ٹی وی کے عہدیدار، پہنچے سپریم کورٹ

ممبئی: ٹی وی ریٹنگ میں ہیرا پھیری معاملہ میں ممبئی پولیس نے ریپبلک ٹی وی کے چیف فنانس آفیسر شیو سبرامنیم سندرم کو ہفتہ کے روز پوچھ گچھ کے لئے طلب کیا تھا۔ تاہم انہوں نے مصروفیت کا حوالہ دیتے ہوئے آج حاضر ہونے کے لئے معذرت کر لی۔ ریپبلک ٹی وی نیٹورک کے سی ایف او نے کہا کہ 16 اکتوبر تک ان کی ملاقاتیں پہلے سے مقرر ہیں۔ انہوں نے گزارش کی ہے کہ انہیں کسی اور تاریخ پر حاضر ہونے کو کہا جائے۔

وہیں، اس معاملہ میں ریپبلک ٹی وی کے سی ایف او سبرامنیم سندرم نے ہفتہ کے روز سپریم کورٹ سے رجوع کیا ہے۔ انہوں نے عدالت عظمیٰ میں عرضی داخل کر کے معاملہ کی جلد سماعت کا مطالبہ کیا ہے۔ عرضی میں ممبئی پولیس کو چیلنج کیا گیا ہے۔

ممبئی پولیس نے ٹی آر پی معاملے کا انکشاف جمعرات کے روز ایک پریس کانفرنس میں کیا تھا اور کہا تھا کہ ریپبلک ٹی وی سمیت تین چینلز کے خلاف شکایت موصول ہوئی ہے۔ پولیس عہدیداروں نے کہا تھا کہ چینل نے اپنی ریٹنگ بڑھانے کے لئے ناظرین کو رقم کی ادائیگی کی، تاکہ وہ اشتہارات سے زیادہ آمدنی حاصل کر سکیں۔ انہوں نے کہا تھا کہ ابھی معاملہ کی جانچ کی جا رہی ہے۔

ممبئی پولیس کمشنر نے دعوی کیا تھا کہ دو چھوٹے چینلوں کے مالکان کو گرفتار کر لیا گیا ہے اور ری پبلک ٹی وی کی تفتیش جاری ہے۔ امکان ظاہر کیا جا رہا ہے کہ مزید کچھ ٹی وی چینل اس معاملے میں پھنس سکتے ہیں۔ اس تعلق سے 4 ملزمین کی گرفتاری ہو چکی ہے جنہیں عدالت میں پیش کیا جا چکا ہے۔ ان چاروں ملزمین کو عدالت نے 13 اکتوبر تک کے لئے پولس حراست میں بھیج دیا ہے۔

پولس ملزمان سے پوچھ تاچھ کر کے یہ جاننے کی کوشش کر رہی ہے کہ اس گھوٹالہ میں کون کون سے ٹی وی چینلز شامل ہیں۔ ان سے بینک اکاؤنٹس کی تفصیلات لینے کے ساتھ ساتھ ٹی آر پی گروہ سے جڑے دیگر ملزمین کی جانکاری بھی اکٹھا کرنے کی کوشش کی جائے گی۔

جن ملزمین کو پولس حراست میں بھیجا گیا ہے ان کے نام وشال بھنڈاری، بومپیلی راؤ مستری، شریس ستیش پٹن شیٹی اور نارائن شرما ہیں۔ ممبئی کرائم برانچ کے ذریعہ داخل ریمانڈ کاپی کے مطابق ونے ترپاٹھی نامی شخص نے وشال بھنڈاری نام کے شخص کو کہا کہ 5 گھروں میں 'انڈیا ٹوڈے' چینل کو کم سے کم 2 گھنٹے دیکھا جائے، اس کے لیے فی گھر 200 روپے مہینہ دیا گیا، جب کہ وشال کو 5000 روپے کمیشن دیا گیا۔ وشال بھنڈاری نے تیجل سولنکی نام کی خاتون سے ملاقات کی اور 2 گھنٹے دن میں 'انڈیا ٹوڈے' دیکھنے کو کہا۔