’ٹرینیں حسب سابق چلتی رہیں گی‘، افرا تفری سے پریشان وزیر ریل کی وضاحت

ہندوستان میں جاری کورونا وائرس کے قہر کے درمیان جہاں دہلی میں لاک ڈاؤن نافذ ہو چکا ہے، وہیں کئی ریاستوں میں لاک ڈاؤن کا اندیشہ ظاہر کیا جا رہا ہے جس کے سبب لوگوں کی ہجرت شروع ہو گئی ہے۔ سبھی جلد از جلد اپنی ریاست پہنچنا چاہ رہے ہیں تاکہ لاک ڈاؤن میں پھنس نہ جائیں۔ اس افرا تفری پر وزیر ریل پیوش گویل نے صاف کیا ہے کہ لوگوں کو پریشان ہونے کی ضرورت نہیں ہے، کیونکہ ٹرینیں پہلے کی ہی طرح چلتی رہیں گی۔ ریلوے اسٹیشنوں پر مہاجر مزدوروں کی بھیڑ جمع ہونے پر انھوں نے کہا کہ کسی طرح کا کوئی لاک ڈاؤن نہیں ہے، لوگ پہلے کی طرح ٹکٹ بک کرا کر آسانی سے کہیں بھی جا سکیں گے۔

منگل کے روز کابینہ میٹنگ میں لیے گئے فیصلوں کی جانکاری دینے کے لیے ورچوئل موڈ میں منعقد پریس کانفرنس میں ایک سوال کا جواب دیتے ہوئے وزیر ریل نے لاک ڈاؤن کے اندیشوں کو پوری طرح خارج کر دیا۔ انھوں نے کہا کہ ’’کسی ریلوے اسٹیشن پر مہاجر مزدور بڑی تعداد میں آئے ہوں اور انھیں تکلیف ہو، ایسی بات نہیں ہے۔ میں خود نجی طور پر انتظام کی مانیٹرنگ کر رہا ہوں۔ ریلوے چیئرمین سے لے کر سبھی افسر انتظامات کی سخت نگرانی کر رہے ہیں۔ اسپیشل ٹرینیں بھی چلوا رہے ہیں۔‘‘

علاوہ ازیں وزیر ریل نے کہا کہ مہاجر مزدور ہوں یا کوئی بھی، کسی کو گھبرانے کی کوئی ضرورت نہیں ہے۔ ہماری گارڑیاں دستیاب ہیں۔ کسی طرح کا کوئی لاک ڈاؤن نہیں ہے۔ ٹرینیں چل رہی ہیں اور آگے بھی چلتی رہیں گی۔ لوگ ٹکٹ بک کرا کر کہیں بھی آ جا سکتے ہیں۔