تروپتی لڈو تنازعہ: ’کم از کم دیوتاؤں کو سیاست سے دور رکھیں‘، سپریم کورٹ کی سبھی سے گزارش

تروپتی مندر لڈو تنازعہ پر سماعت کرتے ہوئے سپریم کورٹ نے 30 ستمبر کو کہا کہ کم از کم دیوتاؤں کو تو سیاست سے دور رکھا جانا چاہیے۔ ساتھ ہی عدالت نے ثبوت مانگتے ہوئے آندھرا پردیش کے وزیر اعلیٰ این چندرابابو نائیڈو کے اسے دعویٰ پر سوال اٹھایا کہ تروپتی مندر کے لڈو بنانے میں مویشیوں کی چربی کا استعمال کیا گیا ہے۔

جسٹس بی آر گوئی اور جسٹس کے وی وشوناتھن کی بنچ نے پورے معاملے کا تذکرہ کرتے ہوئے کہا کہ وزیر اعلیٰ نے خراب لڈو کا دعویٰ 18 ستمبر کو کیا، جبکہ اس معاملے میں 25 ستمبر کو ایف آئی آر درج کی گئی اور ایس آئی ٹی 26 ستمبر کو تشکیل دی گئی۔ اس معاملے میں بنچ نے واضح لفظوں میں کہا کہ ’’ایک اعلیٰ آئینی افسر کے لیے عوامی طور سے ایسا بیان دینا مناسب نہیں ہے جو کروڑوں لوگوں کے جذبات کو متاثر کر سکتا ہے۔‘‘ عدالت نے سالیسٹر جنرل تشار مہتا سے یہ فیصلہ لینے میں مدد کرنے کو کہا کہ کیا ریاستی حکومت کے ذریعہ تشکیل ایس آئی ٹی کی جانچ جاری رہنی چاہیے یا کسی آزاد ایجنسی سے جانچ کرائی جانی چاہیے۔

قابل ذکر ہے کہ بنچ کئی عرضیوں پر سماعت کر رہی تھی جن میں تروپتی مندر کے لڈو بنانے میں مویشی کے چربی کے مبینہ استعمال کی عدالت کی نگرانی میں جانچ کا مطالبہ کرنے والی عرضی بھی شامل ہے۔ سماعت کے دوران عدالت عظمیٰ نے اس بات کا ثبوت مانگا کہ تروپتی مندر کے لڈو بنانے میں آلودہ گھی کا استعمال کیا گیا تھا۔ بنچ کا کہنا ہے کہ ’’کم از کم ہم امید کرتے ہیں کہ دیوتاؤں کو سیاست سے دور رکھا جائے گا۔‘‘

اس معاملے میں سالیسٹر جنرل تشار مہتا نے بنچ سے کہا کہ یہ عقیدہ کا معاملہ ہے، اور اگر لڈو بنانے میں آلودہ گھی کا استعمال کیا گیا ہے تو یہ ناقابل قبول ہے۔ اس معاملے میں ضروری تبادلہ خیال کے بعد بنچ نے آئندہ سماعت کے لیے 3 اکتوبر کی تاریخ مقرر کر دی۔