’ہندوستان کی سیاست کو ٹھیک کرنے کے لیے نیا وزیر اعظم منتخب کرنے کا وقت آ گیا‘، پرینکا گاندھی کی ووٹرس سے اپیل

کانگریس جنرل سکریٹری پرینکا گاندھی نے آج وزیر اعظم نریندر مودی کے ذریعہ کی جا رہی تقریروں کو ہدف تنقید بنایا اور کہا کہ وہ انتخابی تشہیر کے دوران جس طرح قابل اعتراض الفاظ کا استعمال کر رہے ہیں، وہ وزیر اعظم عہدہ کے وقار کو مجروح کر رہا ہے۔ ہفتہ کے روز ایک جلسۂ عام سے خطاب کرتے ہوئے پرینکا گاندھی نے یہ بیان دیا، اور ساتھ ہی کہا کہ ’’وقت آ گیا ہے کہ آپ ایک نیا وزیر اعظم منتخب کریں۔ وقت آ گیا ہے کہ آپ ہندوستان کی سیاست کو ٹھیک کریں، جیسا کہ آپ نے کرناٹک میں کیا تھا۔ یہ آپ کا ملک ہے، اس کی حفاظت کرنا آپ کی ذمہ داری ہے۔‘‘

پرینکا گاندھی نے اپنی تقریر کے دوران کہا کہ اس ملک میں وزیر اعظم منتخب کرنے کی ایک اچھی روایت رہی ہے اور پنڈت جواہر لال نہرو و لال بہادر شاستری جیسے کئی سرکردہ لیڈران ملک کے وزیر اعظم رہے ہیں۔ دو وزرائے اعظم نے تو ملک کے لیے اپنی زندگی قربان کر دی۔ جب آپ ایک وزیر اعظم منتخب کرتے ہیں تو آپ کے ذہن میں ان کے لیے پورا احترام ہوتا ہے اور آپ امید کرتے ہیں کہ وہ اپنے عہدہ کے وقار کو بنائے رکھیں گے۔

جلسۂ عام سے یہ خطاب پرینکا گاندھی نے کرناٹک کے داوَنگیر میں کیا۔ یہاں انھوں نے اپنی تقریر کے دوران مرکز کی مودی حکومت پر خاتون مخالف ہونے کا سنگین الزام بھی عائد کیا۔ انھوں نے ہاسن سے این ڈی اے امیدوار اور جنسی استحصال کے الزامات کا سامنا کر رہے پرجول ریونّا کا معاملہ اٹھایا اور کہا کہ ان کے حمایت میں پی ایم مودی نے انتخابی تشہیر کی جسے فراموش نہیں کیا جا سکتا۔ کانگریس جنرل سکریٹری نے کہا کہ ’’آج ہمارے وزیر اعظم ایسے لیڈر کے ساتھ اسٹیج شیئر کرتے ہیں جنھوں نے کئی خواتین کا جنسی استحصال کیا ہے، وہ ان کے نام پر ووٹ بھی مانگتے ہیں۔‘‘

پرینکا گاندھی نے مودی حکومت کی عوام مخالف پالیسیوں کو بھی تنقید کا نشانہ بنایا۔ انھوں نے کہا کہ بی جے پی کے رابطے بڑے ارب پتیوں سے ہیں جو میڈیا کو اپنے قابو میں رکتے ہیں تاکہ وہ سچائی نہ دکھا سکیں۔ پرینکا گاندھی نے دعویٰ کیا کہ مودی اور بی جے پی کے خلاف بولنے والوں کی آواز بند کرنے اور اپوزیشن لیڈروں کو دبانے و دھمکانے کی کوشش کی جا رہی ہے۔ ہماری تاریخ میں ایسا پہلی بار ہوا ہے جب انتخاب کے وقت دو وزرائے اعلیٰ جیل میں ہیں۔

کرناٹک کی عوام سے خطاب کرتے ہوئے پرینکا نے کہا کہ ’’کرناٹک نے ملک کو کئی عظیم شخصیتیں دیں اور ملک کو راستہ بھی دکھایا۔ کرناٹک کا میرے کنبہ کے ساتھ بہت گہرا رشتہ رہا ہے۔ میری دادی اندرا گاندھی جی جب مشکل میں تھیں تو آپ نے ان کا ساتھ دیا تھا۔‘‘ وہ مزید کہتی ہیں کہ ’’اندرا جی نے شہادت سے ایک دن قبل کہا تھا کہ جب وہ نہیں رہیں گی تو ان کے خون کا ایک ایک قطرہ ملک کے لیے ہوگا۔ جب بھی آپ کی ریاست میں آتی ہوں تو مجھے یقین ہوتا ہے کہ ان کے خون کے ایک ایک قطرے نے آپ کی ترقی کا راستہ ہموار کیا، آپ کو خوشحال بنایا۔‘‘

داوَنگیر لوک سبھا حلقہ سے کانگریس امیدوار کی حمایت میں منعقد اس تقریب میں پرینکا گاندھی کے علاوہ کرناٹک کے نائب وزیر اعلیٰ ڈی کے شیوکمار اور کانگریس جنرل سکریٹری رندیپ سنگھ سرجے والا بھی موجود تھے۔ اس لوک سبھا سیٹ پر آئندہ 7 مئی کو یعنی تیسرے مرحلہ میں ووٹ ڈالے جائیں گے۔