دہلی میں آئی اے ایس کوچنگ سینٹر کے تہہ خانے میں پانی بھر جانے سے 3 افراد کی موت

دہلی کے اولڈ راجندر نگر میں راؤ آئی اے ایس اسٹڈی سینٹر کے تہہ خانے میں پانی بھر جانے سے ایک بڑا حادثہ پیش آیا۔ کوچنگ سینٹر کے پانی سے بھرے تہہ خانے میں ڈوبنے سے دو طالبات اور ایک لڑکا جاں بحق ہو گئے۔

واقعہ کی اطلاع ملتے ہی دہلی پولیس، فائر ڈپارٹمنٹ اور این ڈی آر ایف کی کئی ٹیمیں موقع پر پہنچ گئیں۔ معاملے کی سنگینی کو دیکھتے ہوئے دہلی پولیس کے اعلیٰ افسران بھی موقع پر پہنچ گئے۔ دہلی کی میئر شیلی اوبرائے اور مقامی ایم ایل اے بھی وہاں پہنچ گئے۔ ناراض طلبہ نے یہاں بھی زبردست مظاہرہ کیا۔

تفتیش سے معلوم ہوا ہے کہ تہہ خانے میں لائبریری تھی۔ لائبریری میں عموماً 30 سے ​​35 بچے ہوتے تھے۔ نیوز پورٹل ’اے بی پی‘ پر شائع خبر کے مطابق اچانک تہہ خانے میں تیزی سے پانی سے بھرنے لگا۔ طلباء تہہ خانے میں بنچوں پر کھڑے تھے۔ تہہ خانے میں موجود شیشہ پانی کے دباؤ سے پھٹنے لگا۔

دہلی حکومت کی وزیر آتشی نے چیف سکریٹری نریش کمار کو ہدایت دی ہے کہ وہ واقعہ کی تحقیقات شروع کریں اور 24 گھنٹے کے اندر رپورٹ پیش کریں۔آتشی نے سوشل میڈیا ایکس پر اس واقعے کے بارے میں لکھا، "شام کو دہلی میں شدید بارش کی وجہ سے ایک حادثے کی خبر ہے۔ راجندر نگر میں ایک کوچنگ انسٹی ٹیوٹ کے تہہ خانے میں پانی بھرنے کی خبر ہے۔ دہلی فائر ڈپارٹمنٹ اور این ڈی آر ایف موقع پر موجود ہیں۔

انہوں نے مزید کہا، “دہلی کی میئر اور مقامی ایم ایل اے بھی وہاں ہیں۔ میں ہر منٹ واقعے کی خبر لے رہی ہوں۔ یہ واقعہ کیسے پیش آیا اس کی مجسٹریٹ انکوائری کا حکم دے دیا گیا ہے۔ اس واقعہ کے ذمہ داروں کو بخشا نہیں جائے گا۔

وسطی دہلی کے ڈپٹی کمشنر آف پولیس ایم ہرش وردھن نے کہا، "ہمیں شام 7 بجے ایک کوچنگ انسٹی ٹیوٹ کے تہہ خانے میں پانی جمع ہونے کی اطلاع ملی۔ فون کرنے والے نے بتایا کہ وہاں کچھ لوگوں کے پھنسے ہونے کا امکان ہے۔ ہم اس بات کی تحقیقات کر رہے ہیں کہ پورا تہہ خانہ پانی سے کیسے بھر گیا۔ ایسا لگتا ہے کہ تہہ خانے میں پانی تیزی سے بھر گیا جس کی وجہ سے کچھ لوگ اندر پھنس گئے۔ ‘‘

بتادیں کہ اس ہفتے کے شروع میں بھی وسطی دہلی کے پٹیل نگر علاقے میں شدید بارش کے بعد سول سروسز کے امتحان کی تیاری کر رہے ایک 26 سالہ امیدوار کی اس وقت بجلی کا جھٹکا لگنے سے موت ہو گئی تھی جب وہ ایک لوہے کے گیٹ کو چھو رہا تھا جس سے بجلی گزر رہی تھی۔