کانگریس کا سہ روزہ کنونشن 24 فروری سے رائے پور میں، معیشت اور روزگار سمیت 6 ایشوز پر ہوگا تبادلہ خیال

کانگریس نے آج اعلان کیا کہ پارٹی کا 85واں کنونشن یعنی مکمل اجلاس 24 فروری سے رائے پور میں شروع ہوگا۔ اس اجلاس میں سیاست، معیشت، بین الاقوامی امور، زراعت، سماجی انصاف اور روزگار سے جڑے ایشوز پر تبادلہ خیال کیا جائے گا۔ مکمل اجلاس کے دوران کانگریس ورکنگ کمیٹی کا انتخاب بھی عمل میں آئے گا۔

دہلی میں پارٹی ہیڈکوارٹر میں ایک پریس کانفرنس سے خطاب کرتے ہوئے کانگریس جنرل سکریٹری اور تنظیم کے انچارج کے سی وینوگوپال نے بتایا کہ اے آئی سی سی 24 سے 26 فروری تک اپنا 85واں کنونشن منعقد کرے گی۔ اس میں معیشت اور روزگار سمیت 6 اہم ایشوز پر بات چیت کی جائے گی۔ ساتھ ہی کے سی وینوگوپال نے کہا کہ مکمل اجلاس کے دوران سی ڈبلیو سی (کانگریس ورکنگ کمیٹی) کا انتخاب بھی ہوگا۔ اس کمیٹی میں پارٹی صدر سمیت 25 اراکین ہوتے ہیں۔ 12 اراکیین پارٹی چیف کے ذریعہ نامزد کیے جاتے ہیں اور بقیہ 12 اراکین کا انتخاب اے آئی سی سی اراکین کے ذریعہ کیا جاتا ہے۔

اکتوبر میں کانگریس صدر ملکارجن کھڑگے نے سی ڈبلیو سی کی جگہ پر 47 رکنی ایک علیحدہ کمیٹی تشکیل دی تھی جس میں سونیا گاندھی، راہل گاندھی اور سابق وزیر اعظم منموہن سنگھ شامل تھے۔ ان کے ذمہ داری سنبھالنے سے پہلے ورکنگ کمیٹی کے سبھی اراکین، پارٹی کے بڑے فیصلے لینے والے اتھارٹی، اے آئی سی سی جنرل سکریٹریز اور انچارج نے اپنا استعفیٰ دے دیا تھا۔