منکی پوکس کا دہلی میں تیسرا معاملہ، مزید ایک نائیجیریائی شخص میں انفیکشن کی تصدیق

راجدھانی دہلی میں منکی پوکس کا تیسرا معاملہ سامنے آ چکا ہے۔ میڈیا رپورٹس کے مطابق مزید ایک نائیجیریائی شخص اس انفیکشن کی زد میں آ گیا ہے۔ اس سے قبل پیر کے روز دہلی میں 35 سالہ ایک نائیجیریائی شخص میں منکی پوکس کا انفیکشن ملا تھا۔ ساتھ میں یہ خبریں بھی سامنے آئی تھیں کہ اس نے حال میں کوئی بیرون ملکی سفر نہیں کیا تھا۔

منکی پوکس کے تازہ معاملے نے دہلی میں لوگوں کو مزید خوف زدہ کر دیا ہے۔ متاثرہ شخص کو ایل این جے پی اسپتال میں داخل کرایا گیا ہے۔ ایل این جے پی اسپتال منکی پوکس کے علاج کے لیے نوڈل اسپتال ہے۔ ذرائع کے مطابق اسے گزشتہ پانچ دنوں سے بخار تھا اور جسم پر پھپھولے پڑ گئے تھے۔ اس کے سیمپل کو جانچ کے لیے نیشنل انسٹی ٹیوٹ آف وائرولوجی (این آئی وی)، پونے بھیجا گیا تھا۔ رپورٹ پیر کی شام کو برآمد ہوا جس میں وہ انفیکشن کا شکار پایا گیا۔

قابل ذکر ہے کہ راجدھانی دہلی واقع ایل این جے پی میں داخل پہلے منکی پوکس کے متاثرہ مریض کو چھٹی مل چکی ہے۔ اسپتال کے منیجنگ ڈائریکٹر ڈاکٹر سریش کمار نے یہ جانکاری دی۔ انھوں نے بتایا کہ مریض پوری طرح سے ٹھیک ہے۔ ایل این جے پی میں داخل پہلے منکی پوکس متاثرہ مریض کے جسم کے لال زخم بھی ٹھیک ہو چکے ہیں۔