روس میں ویزا، ماسٹر کارڈ کی خدمات معطل کرنے کے فیصلے کو امریکہ نے سراہا

واشنگٹن: امریکہ نے ہفتے کے روز روس میں ویزا اور ماسٹر کارڈ خدمات کو معطل کرنے کے فیصلے کا خیر مقدم کیا ہے۔ وائٹ ہاؤس کی جانب آج جاری بیان میں کہا گیا کہ بائیڈن-زیلینسکی بات چیت کے بعد امریکی صدر نے روس میں ویزا اور ماسٹر کارڈ کی خدمات معطل کرنے کے فیصلے کا خیر مقدم کیا ہے۔

بیان میں کہا گیا کہ ’صدر بائیڈن نے یوکرین میں روس کی جارحیت کے لیے اس پر پابندیاں بڑھانے کے لیے امریکہ، اس کے اتحادیوں، شراکت داروں اور نجی صنعت کی طرف سے کیے گئے اقدامات پر روشنی ڈالی۔ بائیڈن نے خاص طور پر آج شام ویزا اور ماسٹر کارڈ کی طرف سے خدمات معطل کرنے کے فیصلے کا خیرمقدم کیا‘۔

قبل ازیں یوکرین کے صدر ولادیمیر زیلنسکی نے ٹوئٹر پر کہا کہ انھوں نے ہفتے کے روز بائیڈن کے ساتھ فون پر بات کی۔ اس دوران انہوں نے کیف کے لیے مغربی حمایت اور روس مخالف پابندیوں پر تبادلہ خیال کیا۔ بائیڈن انتظامیہ یوکرین کے لیے امداد میں اضافہ کر رہی ہے اور اضافی فنڈنگ ​​حاصل کرنے کے لیے کانگریس کے ساتھ مل کر کام کر رہی ہے۔ وائٹ ہاؤس کے مطابق بات چیت تقریباً آدھے گھنٹے تک جاری رہی۔

زیلنسکی نے ٹوئٹر پر کہا کہ ’امریکہ کے ساتھ مسلسل ہو رہی بات چیت کے تحت میں نے امریکی صدر کے ساتھ ایک اور بات چیت کی ہے۔ مذاکرات کے ایجنڈے میں سکیورٹی، یوکرین کے لیے مالی امداد اور روس کے خلاف پابندیوں کا جاری رکھنا شامل تھا‘۔