نبی کی شان میں گستاخی کرنے والا مذہبی نہیں، بلکہ منافرت پھیلانے والا دہشت گرد ہے: ڈاکٹر ایوب

پرتاپ گڑھ: نبی کریم صلی اللہ علیہ وسلم کی ذات سب سے افضل اور دنیا کو انسانیت و خواتین کے وقار کی پیروی کرنے والے وہ نبی ہیں جنہوں نے سب سے پہلے خواتین کو عزت بخشی۔ آج جو لوگ مذہب اسلام اور ان کے پیغمبرؐ کے خلاف نفرت و بغض میں اندھے ہوکر ان کی شان میں گستاخی کر رہے وہ مذہبی نہیں ہو سکتے، بلکہ منافرت پھیلانے والے دہشت گرد ہیں۔ نرسنگھا نند سرسوتی بھی ایک دہشت گرد ہے جو ملک کی خیر سگالی کی فضا درہم برہم کرنے میں کوشاں ہے۔ یہاں سوال یہ ہے کہ مسلسل نبی کی شان میں گستاخی کرنے والوں کے سروں پر کس کا ہاتھ ہے؟ پیس پارٹی کے قومی صدر ڈاکٹر ایوب سرجن نے جاری پریس ریلیز کے ذریعہ مذکورہ تاثرات کا اظہار کیا۔

ڈاکٹر ایوب سرجن نے کہا کہ پیس پارٹی ایسے شخص کی چاہے کسی مذہب سے تعلق رکھتا ہو اگر وہ کسی عظیم مذہبی شخصیات و پیغمبر یا دیوتاوں کی شان میں گستاخی کرتا ہے تو وہ قابل مذمت ہے، حکومت ایسے منافرت پھیلانے والے شخص کے خلاف سخت قانونی کارروائی کرے، لیکن شاید موجودہ حکومت میں بیٹھے لوگ جو نرسنگھا نند سرسوتی کی سرپرستی کر رہے ہیں اس کے خلاف کارروائی نہیں ہونے دیں گے۔

تاریخ گواہ ہے کہ جب مکہ فتح ہوگیا تو آپ صلی اللہ علیہ وسلم نے مشرکین کو معاف ہی نہیں کیا بلکہ آزاد کرنے کا فرمان سنایا۔ یہ سن کر مشرکین مکہ کی آنکھیں فرط ندامت سے اشکبار ہوگئیں۔ اسلام زور زبردستی نہیں بلکہ حسن اخلاق و محبت سے پھیلا ہے۔ اسلام دشمنوں کے ذریعہ نبی کریم کی شان میں گستاخی و اہانت آمیز خاکہ تیار کرنا اور اشاعت سراسر بے حیائی و بدترین دہشت گردی ہے۔ ہمارا ملک ہندوستان ایک جمہوری ملک ہے یہاں سبھی مذاہب کو مساوی حقوق حاصل ہیں، کسی مذہب کے خلاف منافرت پھیلانا جرم ہے۔ مگر موجودہ حکومت کو یہ جرم نظر نہیں آرہا ہے۔

انہوں نے کہا کہ جو مذہب اسلام پر شدت پسندی کا الزام عائد کرتے ہیں وہ دراصل اسلام دشمنی میں اندھے ہیں۔ نرسنگھا نند سرسوتی نبی کی شان میں گستاخی کر اسلام دشمنوں کو خوش کرنے کی کوشش کی ہے۔ ڈاکٹر ایوب سرجن نے کہا کہ پیس پارٹی حکومت سے نرسنگھا نند کی فوراً گرفتاری و مقدمہ چلانے اور اس کی تحقیق کرے کی کون سی ملک دشمن طاقت ہے جو ملک میں منافرت پھیلا کر افراتفری کا ماحول پیدا کرنا چاہتی ہے۔ پیس پارٹی یہ برداشت نہیں کرے گی کہ کوئی ملک میں منافرت پھیلا کر افراتفری کا ماحول پیدا کرے، وہ ایسے بد کردار لوگوں جو پیغمبر و عظیم شخصیات کی شان میں گستاخی کر رہے ہیں، کے خلاف عدالت کا دروازہ کھٹکھٹائے گی۔