’نیتی آیوگ‘ کی نئی ٹیم میں امت شاہ اور راجناتھ سنگھ کے علاوہ شیوراج چوہان بھی شامل، پی ایم مودی ہوں گے چیئرمین

نیتی آیوگ کی نئی ٹیم تشکیل دے دی گئی ہے جس میں امت شاہ اور راجناتھ سنگھ کے علاوہ شیوراج سنگھ چوہان کا نام بھی شامل ہے۔ مرکزی حکومت کے ذریعہ تشکیل دی گئی اس نئی ٹیم کے چیئرمین وزیر اعظم نریندر مودی ہوں گے، جبکہ ڈپٹی چیئرمین سمن بیری کو بنایا گیا ہے۔ اس نئی ٹیم میں 4 فُل ٹائم یعنی کُل وقتی اراکین شامل کیے گئے ہیں۔ ان کے نام ہیں وی کے سارسوت، پروفیسر رمیش چند، ڈاکٹر وی کے پال اور اروند ورمانی۔ قابل ذکر بات یہ ہے کہ چیئرمین، ڈپٹی چیئرمین اور چاروں کُل وقتی اراکین نیتی آیوگ کی گزشتہ ٹیم کا بھی حصہ تھے۔ نئی ٹیم میں خصوصی مدعو اراکین کے طور پر این ڈی اے میں شامل کچھ پارٹیوں کے لیڈران کو شامل کیا گیا ہے۔

نیتی آیوگ کی اس ٹیم میں ایکس آفیشیو (از روئے عہدہ) اراکین کے طور پر مرکزی وزیر دفاع راجناتھ سنگھ، مرکزی وزیر داخلہ امت شاہ، مرکزی وزیر زراعت شیوراج سنگھ چوہان اور مرکزی وزیر مالیات نرملا سیتارمن کو جگہ ملی ہے۔ علاوہ ازیں خصوصی مدعو اراکین کے طور پر مرکزی وزیر برائے سڑک ٹرانسپورٹ نتن گڈکری، مرکزی وزیر صحت جے پی نڈا، مرکزی وزیر برائے بھاری صنعت ایچ ڈی کمارسوامی اور ایم ایس ایم ای وزیر جیتن رام مناجھی کو جگہ دی گئی ہے۔

میڈیا رپورٹس کے مطابق پنچایتی راج کے وزیر راجیو رنجن سنگھ، سماجی انصاف کے وزیر ویریندر کمار، ہوابازی کے وزیر کے رام موہن نائیڈو، قبائلی امور کے وزیر جوئل اورم، خواتین و اطفال ترقی کی وزیر انّاپورنا دیوی، فوڈ پروسیسنگ کے وزیر چراغ پاسوان اور وزیر مملکت آزادانہ چارج راؤ اندرجیت سنگھ کو بھی خصوصی مدعو اراکین کے طور پر نیتی آیوگ کی ٹیم کا حصہ بنایا گیا ہے۔