عمر خالد کی درخواست ضمانت پر سپریم کورٹ میں سماعت آج پھر ٹل گئی

نئی دہلی: سپریم کورٹ نے جے این یو کے سابق اسکالر عمر خالد کی ضمانت کی درخواست وقت کی قلت کے سبب آج پھر ملتوی کر دی۔ جسٹس بیلا ایم ترویدی کی صدارت والی بنچ نے کہا کہ ہم اسے کل دیکھیں گے۔ واضح رہے کہ دہلی فسادات کے الزام میں عمر خالد یو اے پی اے کے تحت جیل میں بند ہیں۔

بنچ نے کہا کہ وقت کی قلت کی وجہ سے یو اے پی اے کی آئینی حیثیت کو چیلنج کرنے والی دیگر عرضداشتوں سمیت کئی معاملات پر سماعت نہیں ہوسکے گی لیکن ہم اسے کل پر رکھیں گے۔‘‘ جس پر عمر خالد کی جانب سے پیش ہوئے وکیل کپل سبل نے کہا کہ جمعرات کو اس معاملے پر بحث کے لیے وہ موجود نہیں ہونگے کیونکہ وہ علی گڑھ مسلم یونیورسٹی کی اقلیتی کردار کے معاملے کی سماعت کرنے والی 7 ججوں کی آئینی بنچ کے سامنے پیش ہونگے۔ اس کے علاوہ یہ مشورہ دیا گیا کہ دہشت گردی مخالف قانون کے دیگر پہلووں کو چیلنج کرنے والے دیگر متعلقہ موضوعات پر سماعت شروع ہو سکتی ہے۔

اس کے بعد بنچ دن بھر کے لیے اٹھ گئی اور کہا کہ ہم کل دیکھیں گے۔ واضح رہے کہ گزشتہ ہفتے بھی عمر خالد کی ضمانت کی درخواست پر سماعت ملتوی کر دی گئی تھی۔ سپریم کورٹ نے پہلے اس بات پر زور دیا تھا کہ اس معاملے کی سماعت ضروری ہے کیونکہ عمر خالد سلاخوں کے پیچھے ہیں ۔ عدالت نے سماعت کے التوا ہونے پر خود اعتراض بھی کیا تھا، لیکن وقت کی قلت کے سبب سماعت آج ایک بار پھر ملتوی ہو گئی۔