تاج محل کے بند 22 کمروں کو کھلوانے کی عرضی پر آج نہیں ہو سکی سماعت

تاج محل میں بند پڑے 22 کمروں کو کھلوانے کے لیے جو عرضی الٰہ آباد ہائی کورٹ کی لکھنؤ بنچ میں گزشتہ دنوں ڈالی گئی تھی، اس پر آج سماعت ہونی تھی لیکن یہ ممکن نہیں ہو سکا۔ دراصل وکیلوں کی ہڑتال کی وجہ سے یہ سماعت نہیں ہو پائی اور اب امکان ظاہر کیا جا رہا ہے کہ عرضی پر جمعرات کو سماعت ہوگی۔

عرضی میں تاج محل کے بند 22 کمروں کو کھلوانے اور اے ایس آئی سے اس کی جانچ کرانے کا مطالبہ کیا گیا ہے۔ عرضی میں یہ بھی دعویٰ کیا گیا ہے کہ تاج محل میں ہندو دیوی دیوتاؤں کی مورتیاں رکھی ہوئی ہیں جس کی جانچ سے کئی باتوں سے پردہ ہٹے گا۔ میڈیا رپورٹس کے مطابق ایودھیا میں بی جے پی کے میڈیا انچارج کی طرف سے تاج محل کے ان بند پڑے کمروں کو کھلوانے کے لیے عرضی داخل کی گئی ہے۔

واضح رہے کہ عرضی داخل کیے جانے کے بعد کچھ ہندوؤں میں خوشی کی لہر دوڑ گئی ہے۔ پیر کے روز ایک ہندوتوا لیڈر سنجے جاٹ نے تاج محل پہنچ کر لڈو تقسیم کرنے کی کوشش کی، لیکن پولیس نے بیریکیڈنگ پر ہی انھیں روک دیا۔ پولیس نے جب تلاشی لی تو ان کے پاس سے مٹھائی برآمد ہوئی۔ پولیس نے ہندو لیڈر اور ان کے ساتھ آئے لوگوں کو بیریکیڈنگ سے آگے نہیں بڑھنے دیا۔ حالانکہ ہندوتوا لیڈر سنجے جاٹ سمیت دیگر لوگوں نے یہ معاملہ عدالت میں پہنچنے پر خوشی کا اظہار کیا اور کہا کہ اب عدالت کے ذریعہ یہ طے ہو جائے گا کہ یہ تاج محل ہے یا تیجو مہالیہ۔