مودی حکومت نے کسانوں کے ایک اور مطالبہ کے سامنے گھٹنے ٹیکے، اب پرالی جلانا جرم نہیں

نئی دہلی: مرکز کی مودی حکومت نے کسانوں کے ایک اور مطالبہ کے آگے گھٹنے ٹیک دیئے ہیں۔ مرکزی وزیر زراعت نریندر سنگھ تومر نے تینوں زرعی قوانین کی واپسی کا بل پارلیمنٹ میں پیش کرنے سے قبل آج کہا کہ حکومت نے کسانوں کے ذریعے پرالی جلانے کے عمل کو جرم کے زمرے سے باہر کر دیا ہے۔ انہوں نے کہا کہ کسانوں کا یہ مطالبہ بھی قبول کر لیا گیا ہے۔

مرکزی وزیر زراعت نریندر سنگھ تومر نے کہا کہ کسانوں کے تقریباً تمام مطالبات قبول کر لئے گئے ہیں۔ ایسے حالات میں انہیں اب اپنے اپنے گھروں کو لوٹ جانا چاہئے۔ تومر نے کہا جب تینوں زرعی قوانین واپسی کا اعلان وزیر اعظم نریندر مودی بذات خود کر چکے ہیں اور پارلیمنٹ میں بل لانے کا عمل بھی شروع ہو چکا ہے تو پھر کسانوں کی تحریک کا اب کوئی جواز باقی نہیں رہتا۔ اب کسانوں کو بھی اپنی فراخ دلی کا مظاہرہ کرنا چاہئے اور احتجاج ختم کر دینا چاہئے۔

کسان تحریک کے دوران مظاہرین کے خلاف درج مقدمات کو واپس لینے کے تعلق سے نریندر تومر نے کہا کہ یہ ریاست کا موضوع ہے، لہذا متعلقہ ریاستی حکومتیں ان معاملات پر فیصلہ کریں گی۔ انہوں نے مزید کہا کہ وزیر اعظم مودی نے کسانوں کو کم از کم امدادی قیمت (ایم ایس پی) دینے کے لیے کمیٹی بنانے کا اعلان کیا ہے، ان کی رپورٹ آتے ہی اس پر کارروائی شروع کر دی جائے گی۔

خیال رہے کہ 29 نومبر یعنی پیر کے روز سے شروع ہونے والے پارلیمنٹ کے سرمائی اجلاس کے پہلے ہی دن حکومت زرعی قوانین واپسی پر بل پیش کرنے جا رہی ہے۔ وزیر زراعت نریندر سنگھ تومر بل پیش کریں گے اور اسی روز ایوان میں زرعی قوانین کی واپسی کے معاملے پر بحث ہوگی اور اسے منظور کرایا جائے گا۔ بی جے پی نے اپنے تمام ممبران پارلیمنٹ کو تین سطری وہپ جاری کیا ہے، جس میں کہا گیا ہے کہ وہ اس دن ایوان میں موجود رہیں۔ راجیہ سبھا ممبران پارلیمنٹ کو پہلے ہی وہپ جاری کر دیا گیا ہے۔

غور طلب ہے کہ نیشنل گرین ٹریبیونل (این جی ٹی) نے دسمبر 2015 میں فصلوں کی باقیات کو جلانے پر پابندی عائد کر دی تھی اور اس کی خلاف ورزی کرنے والے کسانوں پر جرمانے عائد کرنے کا التزام کیا تھا۔ این جی ٹی کے حکم کے مطابق 2 ایکڑ اراضی پر پرالی جانے پر 2500 روپے، 2 سے 5 ایکڑ اراضی پر پرالی جلانے پر 5000 روپے اور 5 ایکڑ سے زیادہ اراضی پر پرالی جلانے پر 15000 روپے تک کا جرمانہ عائد کیا جا سکتا تھا۔