حکومت نے فحش مواد نشر کرنے والے 18 او ٹی ٹی پلیٹ فارمس کے ساتھ ساتھ 19 ویب سائٹس اور 10 ایپس پر لگائی پابندی

سوشل میڈیا اور او ٹی ٹی پلیٹ فارمس پر فحش مواد لگاتار بڑھتے جا رہے ہیں۔ اس کو پیش نظر رکھتے ہوئے مرکزی حکومت نے ایک بار پھر سخت قدم اٹھایا ہے۔ مرکزی وزارت اطلاعات و نشریات نے فحش مواد نشر کرنے والے 18 او ٹی ٹی پلیٹ فارمس، 19 ویب سائٹس اور 10 ایپس پر پابندی عائد کر دی ہے۔ اس سے قبل بھی مرکزی حکومت نے کئی بار حکومتی ضابطہ کی خلاف ورزی کی صورت میں او ٹی ٹی پلیٹ فارمس، ویب سائٹس اور یوٹیوب چینلز پر پابندی لگا چکی ہے۔

تازہ معاملے میں او ٹی ٹی پلیٹ فارمس، ویب سائٹس اور ایپس کے علاوہ 57 سوشل میڈیا ہینڈلس کو بھی بلاک کیا گیا ہے۔ حکومت ہند کے مطابق ان سبھی پلیٹ فارمس نے آئی ٹی ایکٹ کی خلاف ورزی کی ہے۔ علاوہ ازیں یہ آن لائن پلیٹ فارمس انڈین پینل کوڈ کی بھی خلاف ورزی کر رہے تھے۔ حکومت کا یہ بھی ماننا ہے کہ گزشتہ کئی سالوں سے یہ او ٹی ٹی پلیٹ فارمس اور ویب سائٹس خواتین کی شبیہ خراب کرنے والے مواد دکھا رہے تھے۔

قابل ذکر ہے کہ جو ہینڈل بلاک کیے گئے ہیں یا پھر جن پر پابندی عائد کی گئی ہے، ان میں سے کسی کے ایک کروڑ تو کسی کے لاکھوں میں یوزرس تھے۔ وزارت اطلاعات و نشریات نے ماہرین قانون کے ساتھ ساتھ ایکسپرٹ کمیٹی کے ساتھ صلاح و مشورہ کے بعد ان پلیٹ فارمس پر پابندی عائد کرنے کا فیصلہ لیا۔