دہلی کی کیجریوال حکومت کو برخاست کرنے کا مطالبہ پہلے صدر جمہوریہ، اور اب وزارت داخلہ تک پہنچا!

صدر جمہوریہ نے مرکزی وزارت داخلہ کو ایک خط بھیجا ہے۔ اس خط میں کیجریوال حکومت کو برخاست کرنے کا مطالبہ کیا گیا ہے۔ دراصل یہ مطالبہ صدر جمہوریہ کی طرف سے نہیں کیا گیا ہے، بلکہ دہلی اسمبلی میں بی جے پی کے اراکین نے گزشتہ دنوں دہلی حکومت کو برخاست کرنے کا مطالبہ کرتے ہوئے ایک خط لکھا تھا جو صدر جمہوریہ کے سپرد کیا تھا۔ اسی مطالبہ پر اب پیش رفت ہوئی ہے اور عرضی صدر جمہوریہ کے پاس سے ہوتے ہوئے مرکزی وزارت داخلہ تک پہنچ گئی ہے۔

بی جے پی اراکین اسمبلی کے ذریعہ صدر جمہوریہ دروپدی مرمو کو پیش کردہ عرضداشت پر صدر جمہوریہ سکریٹریٹ نے نوٹس لیا ہے۔ سکریٹریٹ کے ڈائریکٹر شیویندر چترویدی نے حزب مخالف لیڈر وجیندر گپتا کو خط لکھا جس میں بتایا گیا ہے کہ بی جے پی اراکین اسمبلی نے 30 اگست کو صدر جمہوریہ سے ملاقات کر انھیں عرضداشت پیش کیا تھا۔ اس پر نوٹس لیتے ہوئے مناسب کارروائی کے لیے وزارت داخلہ کو بھیج دیا گیا ہے۔

واضح رہے کہ اس وقت دہلی کے وزیر اعلیٰ اروند کیجریوال آبکاری پالیسی سے متعلق مبینہ منی لانڈرنگ کے معاملے میں جیل کی صعوبت سے گزر رہے ہیں۔ ان کی ضمانت عرضی پر فیصلہ ابھی تک آیا نہیں ہے، اور امید کی جا رہی ہے کہ جلد ہی فیصلہ سامنے آ سکتا ہے۔ ان کی غیر موجودگی میں دہلی حکومت کی کارگزاری بری طرح متاثر ہو رہی ہے۔ یہی وجہ ہے کہ بی جے پی ہی نہیں، کانگریس بھی کیجریوال حکومت کے خلاف لگاتار حملہ آور دکھائی دے رہی ہے۔