آندھرا پردیش میں خوفناک سڑک حادثہ، بس اور ٹرک کی ٹکر میں 7 افراد جاں بحق، 10 سے زائد زخمی

آندھرا پردیش کے پلمنیرو میں ایک ٹرک اور بس کی شدید ٹکر میں سات افراد کی موت ہو گئی ہے۔ اس حادثہ کی خبر ملنے پر ریاست کے وزیر اعلیٰ این چندرابابو نائیڈو نے رنج و غم کا اظہار کیا ہے۔ وزیر اعلیٰ نے موجودہ حالات کا جائزہ لیا ہے اور متاثرین کو دی جا رہی طبی امداد کے بارے میں بھی جانکاری لی ہے۔

میڈیا رپورٹس کے مطابق آندھرا پردیش ریاستی روڈ ٹرانسپورٹ کارپوریشن کی بس بنگلورو کی طرف جا رہی تھی جو چتور ضلع کے پلامنیرو ڈویزن کے پاس موگلی گھاٹ روڈ پر حادثے کا شکار ہوئی جس میں دس سے زائد افراد زخمی ہوئے ہیں۔ اس سڑک حادثہ کی جانکاری دیتے ہوئے ایک پولیس افسر نے بتایا کہ بے قابو ٹرک ڈیوائیڈر پار کر بس سے ٹکرا گی اتھا جس کے سبب یہ خوفناک حادثہ پیش آیا۔ پولیس افسر نے یہ بھی بتایا کہ حادثہ میں ہلاک سبھی لوگوں کی شناخت کر لی گئی ہے۔

اس درمیان آندھرا پردیش وزیر اعلیٰ دفتر کی طرف سے جاری کردہ بیان میں بتایا گیا ہے کہ وزیر اعلیٰ چندرابابو نائیڈو نے حادثہ کے بارے میں افسران سے بات کی اور انھیں ہدایت دی کہ وہ زخمیوں کو بہتر علاج مہیا کرائیں۔ مہلوکین کے کنبوں کے تئیں انھوں نے اپنی ہمدردی کا اظہار بھی کیا ہے۔ انھوں نے یہ بھی یقین دلایا کہ حکومت متاثرین کے کنبوں کے ساتھ کھڑی رہے گی اور ضروری امداد فراہم کرے گی۔