بی جے پی والے گھر پر آئیں، ان کو نتیش کمار کا ویڈیو دکھا دیں گے، تیجسوی یادو کا جواب

تیجسوی یادو نے کہا تھا کہ میرے پاس نتیش کمار کے ہاتھ پیر جوڑنے کا ویڈیو موجود ہے۔ اس پر بی جے پی رہنماؤں نے تیجسوی یادو کو چیلنج کیا تھا کہ اگر کوئی ویڈیو ہے تو اسے جاری کریں۔ اس پر تیجسوی نے کل جواب دیا اور کہا کہ بی جے پی کے لوگوں کو میرے پاس بھیجئے، ویڈیو کو اچھی طرح دکھا بھی دیں گے اور سنا بھی دیں گے۔ میرے پاس ویڈیو ہے۔ بی جے پی والے آکر دیکھ سکتے ہیں۔

کل12 ستمبر کو تیجسوی یادو کارکنوں کے ڈائیلاگ پروگرام کے لیے دربھنگہ پہنچے تھے، جہاں میڈیا نے ان سے پوچھا کہ بی جے پی لیڈر آپ کے ویڈیو بیان پر سوال اٹھا رہے ہیں۔ اس پر انہوں نے کہا کہ اگر بی جے پی والے ان کے پاس آئیں گے تو وہ انہیں دکھا دیں گے۔ دراصل تیجسوی یادو نے کہا تھا کہ جب انہیں عظیم اتحاد میں شامل ہونا تھا تو نتیش گورنر ہاؤس میں استعفیٰ دینے کے بعد 10 سرکلر روڈ پر واقع ان کے گھر آئے تھے۔ نتیش نے راشٹریہ جنتا دل قانون ساز پارٹی کی میٹنگ کے دوران بات کی تھی۔

تیجسوی نے سمستی پور میں اے بی پی سے بات کرتے ہوئے یہ باتیں کہی تھیں کہ جب نتیش کو عظیم اتحاد میں شامل ہونا تھا تو وہ ان کے گھر پر آئے اور  ارکان اسمبلی  اور میری ماں سے کہہ رہے تھے کہ اب وہ کہیں نہیں جائیں گے۔ معافی مانگ رہے تھے، منتیں کر رہے تھے۔ میرے پاس اس کی ویڈیو ہے۔ وہیں بی جے پی رہنماؤں نے اے بی پی کو دیے گئے بیان میں کہا تھا کہ وہ تیجسوی کو چیلنج کرتے ہیں، اگر کوئی ویڈیو ہے تو اسے جاری کریں۔ تیجسوی نے کل اس پر جواب دیا۔