دہلی حکومت کے ذریعہ کوچنگ ریگولیشن ایکٹ لانے کا اعلان کر طلبا کو گمراہ کیا جا رہا: دیویندر یادو

نئی دہلی: راجندر نگر میں بیسمنٹ میں پانی بھرنے کے بعد ڈوب کر ہلاک ہونے والے طلبا کو انصاف دلانے کا مطالبہ کرتے ہوئے کانگریس کارکنان نے آج دہلی پردیش کانگریس کمیٹی کے صدر دیویندر یادو کی قیادت میں سبھی 280 بلاک کانگریس کمیٹی نے کینڈل مارچ نکالا۔ اس کینڈل مارچ میں مقامی طلبا، رہائشی عوام، کانگریس کارکنان سمیت بلاک و ضلع سطح کے افسران اور بوتھ سطح کے کارکنان بھی شامل ہوئے۔

اس موقع پر دیویندر یادو نے کہا کہ مرکز اور دہلی میں برسراقتدار بی جے پی و عآپ طلبا کو انصاف دلانے کی جگہ ان کی موت پر سیاست کر رہی ہے۔ جانچ کے نام پر مرکزی حکومت کی وزارت داخلہ نے افسران کی کمیٹی تشکیل دے کر اور دہلی کی وزیر آتشی نے مجسٹریٹ جانچ کا اعلان کر کے صرف معاملے کو دبانے کے لیے لیپاپوتی کی ہے۔ دہلی پولیس نے ان سے بھی آگے بڑھ کر تھار گاڑی ڈرائیور کو گرفتار کر کے اسے قصوروار ٹھہرانے کی اسکرپٹ تیار کر لی ہے۔ انھوں نے سوال کیا کہ کیا بارش میں گاڑی چلانے والوں کو بھی دہلی پولیس قصوروار ثابت کرے گی؟

دیویندر یادو کا کہنا ہے کہ کیجریوال حکومت میں وزیر تعلیم آتشی کا طلبا کے نمائندہ وفد کو یقین دلانا کہ قصورواروں کو سزا ملے گی، پوری طرح گمراہ کن ہے۔ دہلی کانگریس صدر نے سوال کیا کہ جب دہلی حکومت اور دہلی میونسپل کارپوریشن دونوں پر عآپ قابض ہے، پھر قصوروار کسے بنائیں گے اور سزا کسے دلائی جائے گی۔ انھوں نے یہ بھی پوچھا کہ کچھ افسران کو معطل کر اور چھوٹے ٹھیکیداروں پر کارروائی کر کے عآپ طلبا کی موت کے لیے ذمہ دار بڑے لوگوں کو بچانے کی کوشش تو نہیں کر رہی؟

دہلی کانگریس صدر نے پارٹی کارکنان کو خطاب کرتے ہوئے کہا کہ راجندر نگر حادثہ کے بعد دہلی حکومت نے کوچنگ انسٹی ٹیوٹ ریگولیشن ایکٹ لانے کا اعلان کیا ہے جو طلبا کو گمراہ کرنے کے لیے ہے۔ ایسا اس لیے کیونکہ 2020 میں سورت واقعہ کے بعد آناً فاناً میں ایک ریگولیشن بنانے کا اعلان کیا گیا تھا، اور کچھ اسی طرح کوچنگ انسٹی ٹیوٹ کے مسائل کا حل نکالنے کی جگہ مشورہ طلب کر اسے بھی ایونٹ بنانے میں کچھ لوگ مصروف ہیں۔ دیویندر یادو نے کہا کہ اعلیٰ عہدوں کے امتحانات کی تیاری کر رہے طلبا کے مسائل کا حل نکالنے کے لیے کیجریوال حکومت کوچنگ انسٹی ٹیوٹ اور پی جی کے لیے مستقل سیکورٹی گائیڈلائنس لائے اور ماسٹر پلان 2041 کی تجویز کے مطابق کوچنگ سنٹر اور پی جی اسٹینڈنگ ریگولیشن ایکٹ بنانے پر کام کرے۔