گجرات: عدالت نے ایک خاص مذہب کے لوگوں کا معاشی بائیکاٹ کرنے والوں کے خلاف ایف آئی آر درج کرنے کا دیا حکم

گجرات کی ایک عدالت میں ایسے لوگوں کے خلاف عرضی داخل کی گئی تھی جنھوں نے ایک خاص مذہب کے لوگوں کا معاشی بائیکاٹ کرنے کا اعلان کیا تھا۔ اب عدالت نے اس گروپ کے خلاف ایف آئی آر درج کرنے کا حکم صادر کر دیا ہے۔ الزام ہے کہ کچھ خاص لوگوں پر مشتمل گروپ نے گزشتہ سال فرقہ وارانہ تشدد کے بعد ایک خاص مذہب کے لوگوں کے معاشی بائیکاٹ کی اپیل کی تھی۔ اس سلسلے میں ایک شخص نے عدالت کا رخ کیا اور معاشی بائیکاٹ کی اپیل کرنے والوں کے خلاف ایف آئی آر درج کرانے کا مطالبہ کیا تھا۔

میڈیا رپورٹس کے مطابق جیوڈیشیل مجسٹریٹ فرسٹ کلاس ایچ پی جوشی نے پاٹن ضلع کے بلیسانا پولیس اسٹیشن کو ملزمین کے خلاف مقدمہ درج کرنے کی ہدایت دی۔ ساتھ ہی اس معاملے کی جانچ ایک طے مدت کار میں مکمل کرنے کا حکم دیا۔ عرضی دہندہ مقبول حسین شیخ نے دعویٰ کیا کہ کچھ لوگوں نے بلیسانا میں گزشتہ سال 16 جولائی کو ہوئے فرقہ وارانہ فساد کے واقعہ کا غلط استعمال کیا اور مقامی لوگوں کو ایک خاص مذہب کے خلاف بھڑکایا، ان سے کوئی سامان نہ خریدنے کے ساتھ ہی کرایہ پر دی گئی دکانوں کو خالی کرانے کے لیے بھی اکسایا۔

عرضی دہندہ کا کہنا ہے کہ ایک خاص مذہب کے معاشی بائیکاٹ کی اپیل نے ان کے کاروبار کو بری طرح متاثر کیا اور ان کے طبقہ کے کئی لوگوں کو اس وجہ سے علاقہ چھوڑ کر ہجرت کرنی پڑی۔ عدالت نے ملزمین کے خلاف دو طبقات میں دشمنی پھیلانے اور افواہ پھیلا کر کشیدگی بڑھانے کے الزام میں معاملہ درج کرنے کی ہدایت دی ہے۔ عرضی دہندہ نے عدالت کو یہ بھی بتایا کہ اس نے ضلع ایس پی کو بھی سوشل میڈیا پر پوسٹ کردہ قابل اعتراض ویڈیوز شیئر کی تھی، جن میں خاص طبقہ کے لوگوں کے معاشی بائیکاٹ کے لیے اکسایا گیا تھا، حالانکہ پولیس نے اس معاملے میں کوئی کارروائی نہیں کی۔ آخر میں اسے عدالت کا رخ کرنا پڑا۔