دہلی-این سی آر میں تیز ہواؤں کے ساتھ بارش، موسم ہوا خوشگوار

ملک کی راجدھانی دہلی اور اس کے آس پاس کے علاقوں کے ساتھ ساتھ شمالی ہندوستان میں کئی مقامات پر تیز رفتار ہواؤں اور صبح کے وقت ہوئی بارش کی وجہ سے موسم نے زبردست کروٹ لے لی ہے۔ ہوا کی رفتار خطرناک کی وجہ سے دہلی این سی آر میں کئی مقامات پر درخت اکھڑ گئے ہیں۔ درخت گرنے سے کئی علاقوں میں سڑکیں بند ہوگئیں۔ جس سے لوگوں کو پریشانی ہو رہی ہے۔

اس دوران دہلی کے اندرا گاندھی بین الاقوامی ہوائی اڈے پر پروازیں بھی متاثر ہوئی ہیں۔ ہوائی اڈے نے ایک نوٹس جاری کیا ہے جس میں تمام مسافروں کو مشورہ دیا گیا ہے کہ وہ پرواز کی تازہ ترین معلومات حاصل کرنے کے لیے اپنی ایئر لائنز سے رابطہ کریں۔

محکمہ موسمیات نے آئندہ 24 گھنٹوں کے لیے اورنج الرٹ جاری کرتے ہوئے تیز ہواؤں کی پیش گوئی کی تھی اور کہا تھا کہ اگلے دو روز تک گرمی سے راحت ملے گی۔ محکمہ موسمیات نے کہا تھا کہ اگلے 24 گھنٹوں میں درجہ حرارت معمول سے ایک ڈگری کم رہے گا۔ لیکن آج صبح کی بارش اور تیز ہواؤں نے درجہ حرارت میں تین ڈگری کمی کر کے 23.1 ڈگری سیلسیس کر دیا ہے۔