پی ایم مودی کو ٹکر دینے کے لیے سماجوادی پارٹی نے وارانسی سے اتارا ’اصلی چوکیدار‘

سماجوادی پارٹی نے وارانسی سے اپنا امیدوار بدل دیا ہے۔ وزیر اعظم نریندر مودی کے خلاف ایس پی-بی ایس پی اتحاد نے بی ایس ایف کے سابق جوان تیج بہادر یادو کو انتخابی میدان میں اتار دیا ہے۔ سماجوادی پارٹی نے پہلے شالنی یادو کو بنارس لوک سبھا سیٹ سے اپنا امیدوار بنایا تھا۔ لیکن نامزدگی کے آخری دن تیج بہادر یادو نے سماجوادی پارٹی کے امیدوار کے طور پر وارانسی سیٹ سے پرچہ داخل کیا۔

ایس پی-بی ایس پی-آر ایل ڈی اتحاد نے انھیں باضابطہ طور پر انتخابی نشان بھی الاٹ کر دیا ہے۔ پیر کے روز سماجوادی پارٹی کے ریاستی ترجمان منوج رائے دھوپ چنڈی تیج بہادر کو لے کر نامزدگی کے لیے پہنچے اور میڈیا کو اس بات کی جانکاری دی۔

قابل ذکر ہے کہ شالنی کو گزشتہ دنوں سماجوادی پارٹی جوائن کرنے کے کچھ گھنٹوں بعد ہی سماجوادی پارٹی نے وارانسی سے ٹکٹ دے دیا تھا۔ وہیں تیج بہادر یادو نے یہاں سے بطور آزاد امیدوار انتخاب لڑنے کا اعلان کیا تھا۔

وارانسی سے پی ایم مودی کے خلاف لڑ رہے تیج بہادر کو کئی پارٹیوں کی حمایت مل رہی ہے۔ تیج بہادر یادو گزشتہ کئی دنوں سے پی ایم مودی کے خلاف زور دار تشہیر کر رہے ہیں۔ انتخاب لڑنے کے لیے جاتے وقت انھوں نے پی ایم مودی پر حملہ آور رخ اختیار کرتے ہوئے کہا تھا کہ یہ لڑائی اصلی چوکیدار اور نقلی چوکیدار کے درمیان ہے۔

واضح رہے کہ تیج بہادر یادو بی ایس ایف (بارڈر سیکورٹی فورس) میں رہ کر ملک کی خدمت کر چکے ہیں۔ کچھ وقت پہلے وہ فوج میں خراب کھانا ملنے کی شکایت پر موضوع بحث بنے تھے۔ اس کے کچھ دنوں بعد انھیں فوج سے برخاست کر دیا گیا تھا۔ ان کا الزام ہے کہ انھوں نے خراب کھانے کی شکایت کی تھی اس لیے انھیں نکالا گیا ہے۔ کھانے کی شکایت والا ان کا ویڈیو کافی وائرل بھی ہوا تھا۔