شیئر بازار نے بنایا نیا ریکارڈ، سنسیکس 73574 پوائنٹس پر پہنچا، نفٹی بھی 22300 کے پار

شیئر بازار نے آج ایک نئی اونچائی کو چھو لیا ہے اور کئی کمپنوں کے مارکیٹ ویلیو میں کروڑوں روپے کا اضافہ دیکھنے کو ملا ہے۔ تیسری سہ ماہی میں ملک کی مضبوط جی ڈی پی اور مثبت امریکی افراط زر کے اعداد و شمار سامنے آنے کے بعد شیئر بازار میں ایک زبردست اُچھال دیکھنے کو ملا ہے۔ ہفتہ کے آخری کاروباری دن یعنی جمعہ کو بی ایس ای سنسیکس 1000 پوائنٹ سے زیادہ بڑھ کر 73574 کی نئی ریکارڈ سطح پر پہنچ گیا۔

خوشخبری نفٹی کو لے کر بھی سامنے آ رہی ہے۔ اس نے بھی ایک نئی اونچائی کو چھوا ہے اور پہلی بار 22300 کی سطح کو پار کر گیا ہے۔ بی ایس ای پر فہرست بند سبھی کمپنیوں کے مارکیٹ ویلیو کی بات کی جائے تو یہ مجموعی طور پر 3.23 لاکھ کروڑ روپے بڑھ کر 391.18 لاکھ کروڑ روپے ہو گیا ہے۔

اگر سیکٹر وائز آج کے حالات پر نظر ڈالی جائے تو نفٹی آٹو کے شیئرس میں 1.2 فیصد کا اضافہ درج کیا گیا ہے، کیونکہ کمپنیاں فروری ماہ کی فروخت سے متعلق اعداد و شمار جاری کرنے والی ہیں۔ نفٹی میٹل، پی ایس یو بینک اور آئل اینڈ گیس میں بھی ایک فیصد کا اضافہ درج کیا گیا ہے۔ وسیع بازار میں نفٹی مڈ کیپ 100 نے 0.56 فیصد کا اُچھال درج کیا ہے اور نفٹی اسمال کیپ 100 کی بات کی جائے تو یہ 0.74 فیصد مضبوط ہوا ہے۔