شرد پوار کا دعویٰ، اجیت پوار گروپ کے کئی ارکان اسمبلی کی جینت پاٹل سے ملاقات

مہاراشٹر اسمبلی کے انتخابات اکتوبر میں ہوسکتے ہیں لیکن اس کو لے کر سیاسی ہلچل پہلے ہی تیز ہوگئی ہے۔ اس دوران نیشنلسٹ کانگریس پارٹی (شرد چندر پوار) کے صدر شرد پوار نے منگل کو ایک چونکا دینے والا بیان دیا۔ انہوں نے کہا کہ ان کے بھتیجے اجیت پوار  گروپ کے کچھ ارکان اسمبلی نے ان کے گروپ کے سینئر رہنما جینت پاٹل سے ملاقات کی ہے۔

شرد پوار مہاراشٹر کے نائب وزیر اعلیٰ اجیت پوار کی قیادت میں این سی پی ارکان اسمبلی  کے این سی پی (شرد پوار) میں واپس آنے کے امکان کے بارے میں ایک سوال کا جواب دے رہے تھے۔ اس دوران انہوں نے یہ بڑا دعویٰ کیا۔ شرد پوار نے یہ دعویٰ ایسے وقت کیا ہے جب آنے والے مہینوں میں اسمبلی انتخابات ہونے والے ہیں۔

سابق وزیر اعلیٰ شرد پوار نے اخباری نمائندوں سے کہا، "میں کسی ایسے شخص سے نہیں ملا جو ہماری پارٹی چھوڑ کر  گیا ہو اور واپس آنا چاہتا ہو، لیکن مجھے اطلاع ملی ہے کہ ان میں سے کچھ نے جینت پاٹل سے ملاقات کی ہے۔" جینت پاٹل این سی پی (شرد پوار) کی مہاراشٹر یونٹ کے سربراہ ہیں۔

اپنی پارٹی کے انتخابی نشان 'ترحی (ٹرمپیٹ)بجانے والا آدمی' کے بارے میں، پوار نے کہا کہ انہیں بہت سی پریشانیوں کا سامنا کرنا پڑا کیونکہ کچھ آزاد امیدواروں کو انتخابی نشان کے طور پر 'توتاری' یا ترحی الاٹ کیا گیا تھا۔‘‘

شرد پوار نے کہا کہ ستارہ میں لوک سبھا انتخابات کے دوران ہمیں اس نشان کو لے کر مسئلہ ہوا تھا۔ اب یہ معاملہ عدالت میں ہے، اگلے ہفتے اس کی سماعت ہونی ہے۔ پوار نے کہا، "لوگوں نے لوک سبھا انتخابات کے دوران ملک کو غلط سمت میں لے جانے کی وزیر اعظم نریندر مودی کی کوشش کو ناکام بنایا اور ان کا اتحاد  ریاستی اسمبلی انتخابات میں بھی ایسا ہی مینڈیٹ حاصل کرے گا۔‘‘