یوپی میں دردناک سڑک حادثہ، ڈبل ڈیکر بس ڈیوائیڈر سے ٹکرائی، 36 مسافر زخمی

یوپی کے فیروز آباد ضلع واقع تھانہ نگلا کھنگر علاقہ میں آگرہ-لکھنؤ ایکسپریس وے پر دہلی سے گورکھپور جا رہی ایک ڈبل ڈیکر بس ڈیوائیڈر سے ٹکرا کر گڈھے میں جا گری۔ اس حادثہ سے اس میں سوار 36 مسافر زخمی ہو گئے ہیں۔ ان میں سے 28 مسافروں کو اسپتال میں بغرض علاج داخل کرایا گیا ہے، جبکہ بقیہ کو معمولی علاج کے بعد چھٹی دے دی گئی ہے۔

پولیس سپرنٹنڈنٹ دیہی اکھلیش نارائن نے بتایا کہ گورکھپور کے پرائیویٹ ٹریولس کی بس دہلی سے جمعرات کی شب ساڑھے آٹھ بجے سواری لے کر گورکھپور کے لیے روانہ ہوئی۔ جیسے ہی بس ضلع فیروز آباد کے تھانہ نگلا کھنگر علاقہ میں آگرہ-لکھنؤ ایکسپریس وے پر پہنچی، وہ بے قابو ہو کر ڈیوائیڈر سے ٹکرائی اور گڈھے میں جا گری۔ انھوں نے بتایا کہ اس میں سوار سبھی مسافروں کو باہر نکالا گیا اور ایمبولنس سے سیفئی اسپتال بھیجا گیا جہاں ان کا علاج چل رہا ہے۔

شیام لال گولا کی ایک پرائیوٹ بس نمبر یوپی53ایف ٹی4523 دہلی کے کشمیری گیٹ سے رات کو 8 بجے گورکھپور کے لیے روانہ ہوئی تھی، جس میں 36 سواری مسافر بیٹھے ہوئے تھے۔ رات تقریباً ایک بجے سرسا گنج کے پاس اچانک بس ڈرائیو کو جھپکی آ گئی جس میں بس ریلنگ توڑتی ہوئی سڑک کے نیچے اتر گئی۔ فوراً ہی سرسا گنج اور نگلا کھنگر کی پولیس موقع پر پہنچی اور راحت رسانی کا کام شروع کیا۔