عوامی نمائندگی قانون کو سپریم کورٹ میں چیلنج، اسی قانون کے تحت منسوخ کی گئی راہل گاندھی کی لوک سبھا رکنیت

نئی دہلی: سورت کی عدالت نے راہل گاندھی کو ہتک عزتی کے معاملہ میں مجرم قرار دیتے ہوئے 2 سال کی سزا سنائی ہے، جس کے بعد جمعہ کو راہل گاندھی کی پارلیمنٹ کی رکنیت منسوخ کر دی گئی۔ رکنیت ختم کرنے کی شق کے خلاف سپریم کورٹ میں درخواست دائر کی گئی ہے۔

خیال رہے کہ کیرالہ کی رہنے والی آبھا مرلی دھرن نے راہل گاندھی کے معاملے کا حوالہ دیتے ہوئے سپریم کورٹ میں عرضی داخل کی ہے۔ عرضی میں خاتون نے عوامی نمائندگی ایکٹ کے سیکشن 8(3) کو غیر آئینی قرار دینے کا مطالبہ کیا ہے۔ عرضی میں مرلی دھرن نے کہا کہ آئین کی دفعہ 8(3) کا سیاسی پارٹیاں اپنے فائدے کے لیے غلط استعمال کر رہی ہیں۔ اسے سیاسی ایجنڈے کے فروغ کے لیے استعمال کیا جا رہا ہے۔ اس سے ہمارے انتخابی عمل میں خلل پڑ سکتا ہے۔

ایسے میں جب بھی کسی کو دو سال کی سزا سنائی جائے تو اس کی رکنیت فوری طور پر ختم نہ کی جائے بلکہ اس کے جرائم کے رجحان، کردار وغیرہ کو دیکھ کر فیصلہ کیا جائے۔ غورطلب بات یہ ہے کہ سورت کی ایک عدالت نے 23 مارچ کو کانگریس لیڈر راہل گاندھی کو ان کے 'مودی کنیت' پر تبصرے کے لیے 2019 میں دائر مجرمانہ ہتک عزت کے مقدمے میں دو سال قید کی سزا سنائی تھی۔ تاہم، سماعت کے دوران ہی عدالت نے راہل گاندھی کو ضمانت بھی دے دی اور سزا پر عمل درآمد 30 دن تک ملتوی کر دیا، تاکہ وہ اس فیصلے کو چیلنج کر سکیں لیکن فیصلے کے 24 گھنٹے کے اندر، یعنی 24 مارچ کو ہی راہل گاندھی کی لوک سبھا کی رکنیت ختم کر دی گئی۔

عوامی نمائندگی ایکٹ 1951 کے تحت دو سال یا اس سے زیادہ قید کی سزا پانے والے شخص کو 'سزا کی تاریخ سے' نااہل قرار دیا جاتا ہے۔ اس کے ساتھ وہ شخص سزا پوری ہونے کے بعد چھ سال تک عوامی نمائندہ بننے کے لیے نااہل رہے گا۔ واضح رہے کہ اگر سزا برقرار رہتی ہے تو وہ شخص 8 سال تک کوئی الیکشن نہیں لڑ سکے گا۔