دہلی: ایم سی ڈی میں سیٹوں کی تعداد 272 سے گھٹا کر 250 کی گئی، ’بی جے پی 10 بھی نہیں جیت پائے گی‘

نئی دہلی: مرکز کی مودی حکومت نے دہلی میونسپل کارپوریشن میں کل سیٹوں کی تعداد 272 سے گھٹا کر 250 کر دی ہے۔ یہ اطلاع دہلی گزٹ کے نوٹیفکیشن میں سامنے آئی۔ نوٹیفکیشن میں کہا گیا کہ ایم سی ڈی میں درج فہرست ذات کے لوگوں کے لیے مختص نشستوں کی تعداد 42 مقرر کی گئی ہے۔ دہلی کے پہلے تین میونسپل کارپوریشنوں میں کل 272 وارڈ تھے۔

خیال رہے کہ شمالی اور جنوبی میونسپل کارپوریشنوں میں 104 وارڈ اور مشرقی میونسپل کارپوریشن کے دائرہ اختیار میں 64 وارڈ تھے۔ پارلیمنٹ نے 5 اپریل کو میونسپل کارپوریشن آف دہلی (ترمیمی) بل- 2022 کو تین میونسپل اداروں کے انضمام کے لئے منظور کیا تھا، جس کے تحت وارڈوں کی کل تعداد 250 مقرر کی گئی تھی۔ مرکزی وزارت داخلہ نے جولائی میں دہلی کے میونسپل وارڈوں کی حد بندی کے لیے تین رکنی کمیشن تشکیل دیا تھا۔

دہلی ایم سی ڈی کی سیٹوں کے حوالہ سے جاری ہونے والے نوٹیفکیشن کے بعد یہ چہ میگوئیاں شروع ہو گئی ہیں کہ آیا ایم سی ڈی کے انتخابات اسی وقت ہوں گے جب ملک میں گجرات اور ہماچل پردیش کے اسمبلی انتخابات ہو رہے ہوں گے۔ خیال کیا جا رہا ہے کہ کچھ دنوں کے بعد ہی حدبندی سے متعلق ایک رپورٹ جاری کی جائے گی، جس پر عام لوگ اور سیاسی جماعتیں اپنے مشورے اور اعتراضات درج کرائیں گے۔

اگر دو مہینے کے اندر حد بندی کا پورا کام مکمل ہو جاتا ہے تو توقع ہے کہ اس کے ڈیڑھ یا دو مہینے کے بعد ایم سی ڈی کے انتخابات کا اعلان کر دیا جائے گا۔ ادھر، عام آدمی پارٹی کی طرف سے دعویٰ کیا گیا ہے کہ بی جے پی کو ایم سی ڈی انتخابات میں بری طرح شکست فاش ہوگی۔ پارٹی کے رکن اسمبلی درگیش پاٹھک نے کہا ’’ایم سی ڈی انتخابات کے لئے عوام پوری طرح تیار ہیں۔ اب جبکہ 250 سیٹوں مقرر کر دی گئی ہیں تو ہم دعوے کے ساتھ کہہ رہے ہیں کہ بی جے پی 10 سیٹیں بھی حاصل نہیں کر سکے گی اور عام آدمی پارٹی کی 240 سے زیادہ سیٹوں پر جیت ہوگی۔‘‘