رنجیت ساگر ہیلی کاپٹر حادثہ: 13 دن بعد تلاش اور بچاؤ ٹیم کو ایک پائلٹ کی لاش ملی

جموں: فوج، بحریہ، سب میرین ریسکیو یونٹ اور پولیس کی مشترکہ تلاش اور بچاؤ ٹیموں نے اتوار کو جموں و کشمیر کے کٹھوعہ کے بشولی علاقے میں رنجیت ساگر ہیلی کاپٹر حادثے میں لاپتہ پائلٹوں میں سے ایک کی لاش برآمد کی۔ کٹھوعہ کے سینئر سپرنٹنڈنٹ آف پولیس رمیش کوتوال نے آج یہاں بتایا کہ ایک لاپتہ پائلٹ کی لاش مشترکہ ٹیموں نے گزشتہ شام کو برآمد کی ہے۔

رمیش کوتوال نے کہا کہ سرچ ٹیم کو لیفٹیننٹ کرنل اے ایس باتھ کی لاش رنجیت ساگر جھیل سے 75.9 میٹر کی گہرائی سے ملی۔ انہوں نے کہا کہ دوسرے پائلٹ کی لاش کو تلاش کیا جا رہا ہے۔ انہوں نے بتایا کہ بحریہ کی آبدوز کی ریسکیو یونٹ 13 اگست کو بشولی کے علاقے میں رنجیت ساگر ڈیم کے گہرے پانی میں گرنے والے ہیلی کاپٹر کے پائلٹوں کا سراغ لگانے میں مصروف ہے۔