’اس حکومت نے کیا بڑھایا؟ بے روزگاری، مہنگائی، غریبی اور متروں کی کمائی‘

کانگریس کے سابق صدر راہل گاندھی نے بے روزگاری اور مہنگائی کو لے کر ایک بار پھر مرکز کی مودی حکومت کو تنقید کا نشانہ بنایا ہے۔ انھوں نے ایک ٹوئٹ کیا ہے جس میں لکھا ہے کہ ’’اس حکومت نے کیا بڑھایا؟ بے روزگاری، مہنگائی، غریبی اور صرف اپنے متروں (دوستوں) کی کمائی۔‘‘

اپنے اس ٹوئٹ کے ساتھ راہل گاندھی نے ایک رپورٹ بھی شیئر کی ہے جس میں بتایا گیا ہے کہ متوسط آمدنی والے طبقہ سے ایک تہائی لوگ نکل گئے ہیں۔ اس میں بتایا گیا ہے کہ کووڈ سے پہلے 9.9 کروڑ لوگ متوسط آمدنی والے طبقہ کا حصہ تھے جن کی تعداد گھٹ کر 6.6 کروڑ رہ گئی ہے۔ اعداد و شمار میں یہ بھی بتایا گیا ہے کہ 2011 سے 2019 کے درمیان 7-5 کروڑ لوگ ذیلی آمدنی والے طبقہ سے نکل کر متوسط آمدنی والے طبقہ کا حصہ بنے تھے۔ روزانہ ڈیڑھ سو روپے یا اس سے کم کمانے والوں کی تعداد 7.5 کروڑ جا پہنچی۔

قابل ذکر ہے کہ راہل گاندھی فی الحال آسام کے دورہ پر ہیں۔ اپنے دورے کے دوران راہل گاندھی مودی حکومت کو لگاتار گھیر رہے ہیں۔ عوامی اجلاس کو خطاب کرتے ہوئے راہل گاندھی نے کہا تھا کہ ’’وزیر اعظم نے بڑی بڑی تقریر کی ہے، میک اِن انڈیا، اسٹارٹ اَپ انڈیا اور الگ الگ نعرے دیئے ہیں، لیکن روزگار آج کل ہندوستان میں نہیں ہے۔ بے روزگاری بڑھتی ہی جا رہی ہے۔‘‘