راہل گاندھی 5 فروری کو ہریدوار میں کریں گے ورچوئل جلسہ، کسانوں سے ہوگی گفتگو

اتراکھنڈ اسمبلی انتخاب کے پیش نظر کانگریس کی تشہیر کے لیے پارٹی کے سابق صدر راہل گاندھی 5 فروری کو ہریدوار پہنچیں گے۔ اس دوران وہ کِچھا کے کسانوں کے ساتھ ورچوئل بات چیت کرنے کے ساتھ ہی ریاست کے سبھی 70 اسمبلی حلقوں سے بھی رابطہ کریں گے۔ وہ گنگا آرتی میں بھی حصہ لیں گے۔ حالانکہ ابھی آفیشیل طور پر ان کا پروگرام جاری نہیں ہوا ہے۔

کانگریس کے تنظیمی جنرل سکریٹری متھرا دَت جوشی نے بتایا کہ راہل گاندھی کا پروگرام سبھی 70 اسمبلی حلقوں میں براہ راست دیکھا جا سکے گا۔ اس میں لوگ ان سے سوال بھی کر سکیں گے۔ اہم پروگرام ہریدوار کے جوالاپور علاقہ واقع نہرو یوا کیندر میں منعقد کیا جائے گا۔ اس کے علاوہ اسی دن شام کو راہل گاندھی گنگا آرتی میں بھی حصہ لیں گے۔ جوشی نے بتایا کہ ضلع انتظامیہ سے روڈ شو کے لیے بھی اجازت مانگی گئی ہے۔ اگر اجازت مل جاتی ہے تو ورچوئل پروگرام کے بعد ایک روڈ شو کا بھی انعقاد کیا جائے گا۔

دوسری طرف کانگریس انچارج دیویندر یادو نے کہا کہ راہل گاندھی لگاتار اتراکھنڈ کے ایشوز کو اٹھانے کے ساتھ ان کے حل کی بات بھی کرتے رہے ہیں۔ ان کا یہ دورہ بھی یقینی طور پر ایشوز کے حل کی سمت میں بڑا قدم ہوگا۔ اس سے پہلے گزشتہ سال 16 دسمبر کو راہل گاندھی دہرادون آئے تھے جہاں انھوں نے پریڈ گراؤنڈ میں ایک ریلی کو خطاب کیا تھا۔