’لاک اَپ میں جمہوریت کے چوتھے ستون کا چیر ہرن‘، مدھیہ پردیش میں صحافیوں کے کپڑے اتروانے پر راہل گاندھی کا سخت رد عمل

مدھیہ پردیش کے سیدھی ضلع میں بی جے پی رکن اسمبلی کے خلاف خبر لکھنے پر لاک اَپ میں صحافیوں کے کپڑے اتروانے پر راہل گاندھی نے سخت رد عمل ظاہر کیا ہے۔ انھوں نے ایک ٹوئٹ میں لکھا ہے کہ ’’لاک اَپ میں جمہوریت کے چوتھے ستون کا چیر ہرن! یا تو حکومت کی گود میں بیٹھ کر ان کی تعریفیں کرو، یا جیل کے چکر کاٹو۔ ’نئے بھارت‘ کی حکومت سچ سے ڈرتی ہے۔‘‘

دراصل مدھیہ پردیش کے ایک پولیس تھانے میں کھڑے نیم برہنہ مردوں کے ایک گروپ کی تصویریں سوشل میڈیا پر سامنے آئی ہیں۔ اس میں ایک مقامی یوٹیوب صحافی کنشک تیواری کو بھی دیکھا جا سکتا ہے۔ تیواری کے مطابق انھیں دیگر لوگوں کے ساتھ گرفتار کیا گیا تھا، جب وہ ایک تھیٹر اداکار نیرج کندر کے بارے میں پوچھ تاچھ کرنے کے لیے پولیس اسٹیشن گئے تھے۔ کندر کو بی جے پی رکن اسمبلی اور ان کے بیٹے کے خلاف نازیبا زبان کا استعمال کرنے کے الزام میں گرفتار کیا گیا تھا۔

سوشل میڈیا پر دکھائی دینے والی تصویریں سیدھی ضلع کے ایک پولیس اسٹیشن کی ہیں، جنھیں مبینہ طور پر 2 اپریل کو کلک کیا گیا تھا۔ مقامی یوٹیوب صحافی کنشک تیواری نے بتایا کہ وہ دیگر لوگوں کے ساتھ نیرج کندر کی گرفتاری کی مخالفت کر رہے تھے، جنھیں پولیس نے سیدھی سے بی جے پی رکن اسمبلی کیدارناتھ شکلا کی ایف آئی آر کی بنیاد پر گرفتار کیا تھا۔

تیواری نے دعویٰ کیا کہ وہ اپنے کیمرہ پرسن کے ساتھ تھیٹر اداکار کے والد کی گزارش پر کندر کی گرفتاری کے بارے میں پوچھنے کے لیے پولیس اسٹیشن گئے تھے۔ تیواری نے کہا کہ پولیس نے انھیں گرفتار کر لیا اور 18 گھنٹے سے زیادہ وقت تک لاک اَپ میں رکھا اور بری طرح پیٹا۔ تیواری کا کہنا ہے کہ ’’میں ایک آزاد صحافی کی شکل میں کام کر رہا ہوں اور میں نے حال ہی میں ایک رپورٹ فائل کی تھی، جسے کیدارناتھ شکلا کے خلاف مانا گیا تھا اور اس خبر کی وجہ سے مجھے نشانہ بنایا گیا۔‘‘