’یہ غریبوں کا استحصال کرنے کی پالیسی ہے‘، راہل گاندھی نے منریگا بجٹ میں تخفیف اور آدھار سے جوڑنے پر اٹھائے سوال

کانگریس کے سابق صدر راہل گاندھی نے منریگا بجٹ میں تخفیف اور تنخواہ کو آدھار سے جوڑنے کی مرکزی حکومت کی پالیسی پر سوال کھڑے کیے ہیں۔ انھوں نے اسے مرکز کے ذریعہ غریبوں کا استحصال کرنے کی پالیسی قرار دیا ہے اور کہا ہے کہ اس طرح غریبوں کی آمدنی پر حملہ کیا جا رہا ہے۔ انھوں نے کہا کہ ’’نہ نئی سوچ، نہ کوئی منصوبہ، بس ایک پالیسی، غریبوں کا استحصال۔‘‘

راہل گاندھی نے سوشل میڈیا پر ایک پوسٹ جاری کر کہا ہے کہ منریگا ہندوستان کی دیہی معیشت کی بنیاد ہے۔ ایک انقلابی پالیسی ہے جس نے لاتعداد کنبوں کو سہارا دیا ہے۔ کروڑوں کنبوں کا گھر چلا رہا منریگا منصوبہ مرکز کی استحصال والی پالیسیوں کا شکار بنتا جا رہا ہے۔

کانگریس کے سابق صدر نے مرکز پر الزام عائد کرتے ہوئے کہا کہ پہلے منریگا کا بجٹ کاٹنا اور اب تنخواہ کو آدھار سے جوڑنا، یہ دونوں غریبوں کی آمدنی پر حملہ ہے۔ یو پی اے حکومت کی آدھار کارڈ سے متعلق سوچ تھی لوگوں کو سہولیت دینے کی، شناخت کی اور معاشی سیکورٹی دینے کی۔ لیکن موجودہ حکومت نہ صرف اس سوچ کا غلط استعمال کر رہی ہے بلکہ اس کا استعمال غریب طبقہ کے خلاف کر رہی ہے۔

راہل گاندھی نے کہا کہ نہ آدھار کا ٹھیک طرح سے استعمال ہوا، نہ صحیح سیکورٹی کا انتظام کیا گیا۔ آدھار کارڈ کو منریگا کے لیے لازمی بنا دینے سے 57 فیصد دیہی مزدوروں کو دِہاڑی میں نقصان ہوگا۔ نئے روزگار دینے کی ان کے پاس کوئی پالیسی نہیں ہے۔ بس لوگوں کا روزگار چھیننا اور غریبوں کو ان کے حق کا پیسہ ملنے میں رخنات پیدا کرنا ہی اس حکومت کی نیت بن گئی ہے۔ آخر میں کانگریس لیڈر نے کہا کہ ’’نہ نئی سوچ، نہ کوئی منصوبہ، بس ایک پالیسی، غریبوں کا استحصال۔‘‘