پنجاب بلدیاتی انتخابات: بی جے پی دم بخود، کانگریس کا ’موہالی میونسپل کارپوریشن‘ پر بھی قبضہ

چنڈی گڑھ: پنجاب کے موہالی میونسپل کارپوریشن کے آج اعلان شدہ نتیجوں میں کل پچاس سیٹوں میں سے 38 پر کانگریس نے جیت حاصل کر لی ہے۔ اسی کے ساتھ کانگریس کا سبھی آٹھ کارپوریشنوں پر قبضہ ہوگیا ہے۔ کل سات میونسپل کارپوریشنوں کا نتیجہ سامنے آیا تھا اور سبھی میں کانگریس نے فتح کا پرچم لہرایا تھا۔ گویا کہ بی جے پی اور شرومنی اکالی دل کی کشتی اس الیکشن میں پوری طرح سے ڈوب گئی۔

موہالی میونسپل کارپوریشن کے حاصل نتائج کے مطابق عام آدمی پارٹی ،شرمنی اکالی دل اور بھارتیہ جنتا پارٹی کے امیدوار کھاتہ تک نہیں کھول سکے۔ شرومنی اکالی دل سے الگ ہوئے سابق میئر کلونت سنگھ کے آزاد گٹ نے 9 سیٹیں حاصل کیں اور 4 دیگر آزاد امیدواروں کی جھولی میں گئیں۔

ریاست کی آٹھ میونسیپل کارپوریشنوں کی ترقی کے پیش نظر مثبت سوچ کے ساتھ کانگریس پارٹی پر بھروسہ ظاہر کیا ہے اور بڑی تعداد میں پنجاب کے مقامی بلدیاتی انتخابات میں پارٹی کے امیدواروں نے جیت حاصل کی ہے۔ یہ معلومات آج صحت اور لیبر کے وزیر بلبیر سنگھ سدھو نے میونسپل کارپوریشن موہالی کے ووٹنگ میں ملی بڑی جیت کے بعد دی۔

سدھو نے بتایا کہ موہالی میونسپل کارپوریشنوں میں 50 سیٹوں میں سے 38 سیٹوں پر جیت حاصل کی ہے، جبکہ عام آدمی پارٹی،اکالی دل اور بی جےپی کو مسترد کردیا اور یہ پارٹیاں کھاتہ تک نہیں کھول سکیں۔ پنجاب میں آئے نتیجوں نے ثابت کردیا ہے کہ ووٹروں نے وزیراعلی کیپٹن امرندر سنگھ کی قیادت والی پنجاب حکومت کےوسیع ترقیاتی کاموں کو دیکھتے ہوئے میونسیپل کارپوریشن اور مقامی کونسل اور شہر پنچایتوں کی الیکشن میں کانگریس پارٹی کے امیدواروں میں یقین ظاہر کیا ہے۔