اتر پردیش میں پرینکا گاندھی کے فعال ہونے سے حالات تبدیل ہوئے: دگوجے سنگھ

بھوپال: کانگریس کے سینئر لیڈر دگ وجے سنگھ نے آج کہا کہ پارٹی کی جنرل سکریٹری پرینکا گاندھی واڈرا کے اتر پردیش میں سرگرم ہونے کے بعد سے پارٹی کی پوزیشن میں کافی تبدیلی آئی ہے۔ یہاں ریاستی کانگریس کے دفتر میں پریس کانفرنس کے دوران ایک سوال کا جواب دیتے ہوئے راجیہ سبھا کے رکن دگوجے سنگھ نے کہا کہ جب سے پرینکا گاندھی اتر پردیش میں سرگرم ہوئی ہیں، کانگریس کی صورتحال بدل گئی ہے۔ ورنہ پہلے کانگریس کا چرچا تک نہیں ہوتا تھا۔ مستقبل قریب میں اتر پردیش میں ہونے والے اسمبلی انتخابات کے تناظر میں انہوں نے کہا کہ پرینکا گاندھی واڈرا کی محنت رنگ لائے گی۔

کانگریس کی طرف سے اتوار کو شروع کیے جانے والے ملک گیر جن جاگرن ابھیان کے بارے میں جانکاری دینے کے مقصد سے منعقد ایک پریس کانفرنس میں دگوجے سنگھ نے کہا کہ آج کے دور میں مہنگائی اور گرتی ہوئی معیشت اہم مسئلہ ہے۔ اسی وجہ سے ملک میں حال ہی میں ہوئے ضمنی انتخابات کے نتائج آنے کے فوراً بعد مرکزی حکومت نے پٹرول اور ڈیزل کی قیمتوں میں کمی کردی۔ انہوں نے کہا کہ ضمنی انتخابات کی طرح 2022 میں اتر پردیش اسمبلی انتخابات اور 2023 میں مدھیہ پردیش اسمبلی انتخابات میں بھی یہی نتائج آنے والے وقت میں نظر آئیں گے۔

ایک اور سوال کا جواب دیتے ہوئے دگوجے سنگھ نے کہا کہ ضلع پنا میں بی جے پی کے ایک بڑے لیڈر نے ایک قبائلی شخص کی زمین پر قبضہ کر رکھا ہے۔ اور اس سلسلے میں متعلقہ خاندان کی طرف سے شکایت کے باوجود پولیس اور انتظامیہ کوئی کارروائی نہیں کر رہی ہے۔