وکاس دوبے انکاؤنٹر: پرینکا گاندھی اور رندیپ سرجے والا نے بھی اٹھائے سوال

نئی دہلی: کانگریس کی جنرل سکریٹری اور اترپردیش کی انچارج پرینکا گاندھی واڈرا نے جمعہ کے روز مڈبھیڑ میں گینگسٹر وکاس دوبے کی موت کے بعد ریاست کی یوگی آدتیہ ناتھ حکومت کو نشانہ بنایا اور سوال کیا کہ مجرم کا تو خاتمہ ہوگیا لیکن اس کے جرائم کو تحفظ دینے والوں کا کیا ہو رہا ہے جو اس کے جرائم کی حفاظت کرتے ہیں؟ پرینکا گاندھی نے ٹوئٹ میں لکھا ہے کہ ’’مجرم کا خاتمہ ہوگیا، جرائم اور اس کو تحفظ دینے والے لوگوں کا کیا‘‘۔

دوسری طرف کانگریس کے شعبہ مواصلات کے سربراہ رندیپ سنگھ سرجے والا نے بھی وکاس دوبے انکاؤنٹر پر سوال اٹھائے ہیں۔ انھوں نے کہا ہے کہ ’’وکاس دوبے انکاؤنٹر میں مارا گیا۔ کئی لوگوں نے پہلے ہی خدشہ ظاہر کیا تھا لیکن بہت سارے سوالات چھوٹ گئے ہیں‘‘۔

رندیپ سرجے والا نے اس سلسلے میں حکومت سے پوچھا ’’اگر اسے بھاگنا ہی تھا تو اجین میں سرینڈرکیوں کیا۔ اس مجرم کے پاس کیا راز تھے جو اقتدار اور انتظامیہ سے گٹھ جوڑ کر کے بے نقاب کرتے۔ گزشتہ 10 دن کی کال ڈٹیلز کیوں جاری نہیں کی گئیں‘‘۔

واضح رہے کہ جمعہ کے روز آٹھ پولس اہلکاروں کے قاتل پانچ لاکھ روپے کا انعامی وکاس دوبے کو اجین سے کانپور لارہی ایس ٹی ایف کی گاڑی الٹ گئی اوراس نے پولس کا ہتھیار لے کر فرار ہونے کی کوشش کی جس کے بعد وہ ایک انکاؤنٹر میں مارا گیا۔