وزیر اعظم مودی کا فاروق عبداللہ کی فوری صحتیابی کے لئے نیک خواہشات کا اظہار

سری نگر: وزیر اعظم نریندر مودی نے نیشنل کانفرنس کے صدر و رکن پارلیمان ڈاکٹر فاروق عبداللہ، جن کا کورونا ٹیسٹ مثبت آیا ہے، کی فوری صحتیابی اور ان کے اہلخانہ کی اچھی صحت کے لئے نیک خواہشات کا اظہار کیا ہے۔ انہوں نے ڈاکٹر فاروق عبداللہ کے فرزند اور سابق وزیر اعلیٰ عمر عبداللہ کو مخاطب ہو کر کہا کہ میں آپ اور جملہ اہلخانہ کی اچھی صحت کے لئے بھی دعا گو ہوں۔

موصوف وزیر اعظم نے منگل کے روز ان باتوں کا اظہار عمر عبداللہ کے اس ٹوئٹ کے ردعمل میں اپنے ایک ٹوئٹ میں کیا جس میں انہوں نے اپنے والد ڈاکٹر فاروق کا کورونا ٹیسٹ مثبت آںے کی اطلاع دی تھی۔ وزیر اعظم نے اپنے ٹوئٹ میں کہا کہ 'میں ڈاکٹر فاروق عبداللہ جی کی اچھی صحت اور کورونا سے فوری صحتیابی کے لئے دعا گو ہوں۔ میں عمر عبداللہ اور دیگر اہلخانہ کی اچھی صحت کے لئے بھی دعا گو ہوں'۔

عمر عبداللہ نے اس پر وزیر اعظم نریندر مودی کا شکریہ ادا کرتے ہوئے اپنے ایک ٹوئٹ میں کہا کہ 'میں اپنے والد اور دیگر اہلخانہ کی طرف سے آپ کی نیک خواہشات کے اظہار اور دعاؤں کے لئے مشکور ہوں'۔ دریں اثنا جموں وکشمیر کے لیفٹیننٹ گورنر منوج سنہا نے بھی ڈاکٹر فاروق کی اچھی صحت اور فوری صحتیابی کے لئے دعا کی ہے۔

انہوں نے اپنے ایک ٹوئٹ میں کہا کہ 'میں رکن پارلیمان ڈاکٹر فاروق عبداللہ جی کی فوری صحتیابی اور اچھی صحت کے لئے دعا گو ہوں۔ میری نیک خواہشات اور دعائیں ان کے ساتھ ہیں'۔ پی ڈی پی صدر اور سابق وزیر اعلیٰ محبوبہ مفتی نے ڈاکٹر فاروق عبداللہ کا کورونا ٹیسٹ مثبت آنے پر اظہار افسوس کرتے ہوئے ان کے جلد صحتیاب ہونے کی امید ظاہر کی ہے۔