صدر جمہوریہ دروپدی مرمو ملکہ برطانیہ الزبتھ کی آخری رسومات میں شرکت کے لیے جائیں گی لندن

ہندوستانی صدر دروپدی مرمو 19 ستمبر کو لندن میں ملکہ برطانیہ الزبتھ دوئم کی آخری رسومات میں شامل ہوں گی اور ہندوستان کی نمائندگی کریں گی۔ ملکہ الزبتھ کے انتقال پر حکومت ہند کی طرف سے اظہارِ ہمدردی کرنے کے لیے مرمو 17 سے 19 ستمبر تک لندن کے دورے پر رہیں گی۔

وزیر خارجہ ایس جئے شنکر نے ہندوستان کی طرف سے اظہارِ ہمدردی کے لیے 12 ستمبر کو نئی دہلی میں برطانوی ہائی کمیشن کا دورہ کیا تھا۔ ہندوستان نے اتوار (11 ستمبر) کو ایک دن کا یومِ غم بھی منایا تھا۔ وزارت خارجہ نے ایک بیان میں کہا ہے کہ ’’عزت مآب ملکہ الزبتھ دوئم کی 70 سالہ حکومت میں ہند-برطانیہ کے تعلقات بہت وسیع اور مضبوط ہوئے ہیں۔ انھوں نے دولت مشترکہ سربراہ کی شکل میں دنیا بھر کے لاکھوں لوگوں کی فلاح میں اہم کردار نبھایا ہے۔‘‘

واضح رہے کہ برطانیہ کی سابق قومی صدر اور دولت مشترکہ ممالک کی سربراہ ملکہ الزبتھ کا 8 ستمبر کو انتقال ہو گیا تھا۔ صدر جمہوریہ دروپدی مرمو، نائب صدر جگدیپ دھنکھڑ اور وزیر اعظم نریندر مودی نے ان کے انتقال پر اظہارِ غم کیا تھا۔ اپوزیشن کی طرف سے کانگریس صدر سونیا گاندھی اور پارٹی کے سابق صدر راہل گاندھی نے بھی ملکہ برطانیہ کے انتقال پر اظہارِ افسوس کیا تھا۔

وزیر اعظم نریندر مودی نے اپنے ٹوئٹ میں کہا تھا کہ ’’عزت مآب ملکہ الزبتھ دوئم کو ایک اعلیٰ ہستی کی شکل میں یاد کیا جائے گا۔ انھوں نے اپنے ملک اور لوگوں کو قابل ترغیب قیادت فراہم کی۔ انھوں نے عوامی زندگی میں وقار اور منکسرالمزاجی کا مظاہرہ کیا۔ ان کے انتقال سے غمزدہ ہوں۔‘‘