ڈاکٹروں کی سخت نگرانی میں ہیں پرنب مکھرجی، حالت ہنوز سنگین

سابق صدر جمہوریہ پرنب مکھرجی کی حالت میں اب تک کوئی بہتری دیکھنے کو نہیں مل رہی ہے۔ انھیں ڈاکٹروں کی سخت نگرانی میں اب بھی لائف سپورٹ سسٹم پر رکھا گیا ہے۔ اسپتال کے ذریعہ روزانہ پرنب مکھرجی کی طبیعت سے متعلق ہیلتھ بلیٹن جاری کیا جا رہا ہے اور آج جاری کردہ بلیٹن میں بھی ان کی طبیعت میں کسی بہتری کی بات نہیں کہی گئی۔ حالانکہ ڈاکٹروں کا یہ ضرور کہنا ہے کہ ان کی صحت میں کوئی گراوٹ بھی نہیں آئی ہے جو کافی مثبت ہے۔

قابل ذکر ہے کہ پرنب مکھرجی دہلی کینٹ واقع آر اینڈ آر آرمی اسپتال میں داخل ہیں۔ گزشتہ دنوں وہ کورونا پازیٹو بھی پائے گئے تھے جس کے بعد فوراً اسپتال میں داخل ہوئے اور علاج شروع ہو گیا۔ دماغ میں خون کا تھکّا جمع ہونے کی وجہ سے ایمرجنسی آپریشن کرنا پڑا جسے ڈاکٹروں نے کامیاب بتایا، لیکن انھیں وینٹی لیٹر پر رکھا گیا تاکہ بہتر علاج ہو سکے۔ سرجری کے بعد سے ہی پرنب مکھرجی کی حالت پر جمود طاری ہے۔ آج ہیلتھ بلیٹن میں بتایا گیا کہ ماہرین کی ایک ٹیم باریکی سے پرنب مکھرجی پر نظر رکھے ہوئی ہے اور فی الحال سبھی کلینیکل پیرامیٹر مستحکم بنے ہوئے ہیں۔