جہانگیر پوری تشدد کے بعد سیاست تیز، وی ایچ پی رہنماؤں کو متاثرین سے ملنے سے روکا

دہلی کے جہانگیر پوری میں فرقہ وارانہ تشدد کے بعد سیاست تیز ہو گئی ہے اور وہاں ایک کے بعد ایک سیاسی پارٹی کے رہنماؤں کے جانے کا سلسلہ جاری ہے۔ پہلے بائیں محاذ کا وفد وہاں گیا تھا، کل کانگریس کا وفد وہاں پہنچا جبکہ اس سے قبل آل انڈیا مجلس اتحاد المسلمین کے صدر اسدالدین اویسی نے وہاں کا دورہ کیا تھا۔ آج ترنمول کانگریس کی فیکٹ فائنڈنگ ٹیم نے وہاں کا دورہ کیا اور اس سے قبل وشو ہندو پریشد کے رہنماؤں نے وہاں جانے کی کوشش کی لیکن ان کو پولیس نے روک دیا۔ پولیس نے ابھی تک کسی بھی سیاسی پارٹی کے رہنما کو متاثرین سے ملنے نہیں دیا ہے۔

دریں اثناء تشدد کے بعد آج پہلا جمعہ ہے اس لئے وہاں کے حالات بہت کشیدہ بتائے جا رہے ہیں جس کی وجہ سے بڑی تعداد میں سیکورٹی فورسز تعینات کی گئی ہیں اور سی سی ٹی وی کیمروں سے بھی کڑی نگرانی کی جا رہی ہے۔ دریں اثناء جامع مسجد سے اپیل کی گئی ہے کہ صورتحال کے پیش نظر جمعہ کی نماز میں بچوں کو مسجد میں اپنے ساتھ نہ لایا جائے۔

جہانگیرپوری پہنچے وشو ہندو پریشد کے وفد نے پولیس کی طرف سے آگے جانے سے روکنے پر ناراضگی کا اظہار کیا۔ انہوں نے بتایا کہ ان کے ڈیڑھ سو سے زائد کارکن ملنے آئے تھے لیکن ڈی سی پی نے درخواست کی کہ صرف پانچ لوگ ملنے جائیں گے۔ اس کے بعد پانچ لوگ آئے لیکن ان کو بھی متاثرین سے ملنے نہیں دیا گیا۔ وی ایچ پی نے کہا کہ جو لوگ تہوار منا رہے تھے ان پر حملہ کیا گیا، یہ سب ایک سازش ہے۔

واضح رہے کہ دہلی کے جہانگیر پوری میں ہفتہ کی شام کو ہنومان جینتی کے جلوس کے دوران اشتعال انگیز نعرے بازی کے بعد دو فرقوں میں پتھربازی کے بعد ماحول کشیدہ ہو گیا تھا۔ پتھر بازی کے بعد آتش زنی کا واقعہ بھی پیش آیا۔ اس کے بعد جب ماحول ٹھیک ہوتا نظر آ رہا تھا تو بی جے پی کے رہنما کے کہنے پر متاثرہ علاقہ میں انہدامی کارروائی شروع ہو گئی لیکن سپریم کورٹ نے مداخلت کرتے ہوئے انہدامی کارروائی پر روک لگا دی ہے۔