پی ایم مودی کے بھائی پرہلاد مودی کار حادثہ میں زخمی، بیٹا-بہو بھی تھے ساتھ، علاج کے لیے اسپتال میں داخل

وزیر اعظم نریندر مودی کے بھائی پرہلاد مودی کی کار کرناٹک کے میسور میں حادثہ کا شکار ہو گئی ہے۔ اس کار میں پرہلاد مودی کے ساتھ ساتھ ان کا بیٹا، بہو اور پوتا بھی موجود تھے۔ کار میں سوار چاروں افراد کے ساتھ ساتھ ڈرائیور کو بھی چوٹ پہنچی ہے۔ میڈیا رپورٹس میں بتایا جا رہا ہے کہ حادثہ میسور تعلقہ کے کڑاکولا کے پاس ہوا۔ پرہلاد مودی اپنی مرسیڈیز بینز کار سے بنگلورو سے باندی پور کی طرف جا رہے تھے۔

موصولہ اطلاعات کے مطابق حادثہ میں پرہلاد مودی، ان کی بہو اور پوتے کو کچھ زیادہ چوٹ پہنچی ہے جبکہ بیٹے اور ڈرائیور کو معمولی چوٹیں آئی ہیں۔ میسور ایس پی سیما لٹکر اس حادثہ کی خبر سن کر فوراً جائے وقوع پر پہنچیں۔ زخمیوں کو فوری طور پر میسور کے جے ایس ایس اسپتال میں داخل کرایا گیا ہے جہاں علاج جاری ہے۔

واضح رہے کہ پرہلاد مودی گجرات فیئر پرائس شاپس اینڈ کیروسین لائسنس ہولڈر ایسو سی ایشن کے سربراہ ہیں۔ حال ہی میں وہ مدھیہ پردیش گئے تھے جہاں بیتول ضلع میں ایک سماجی تقریب میں شرکت ہوئی تھی۔ وہاں پرہلاد مودی نے اپنے خطاب کے دوران کہا تھا کہ ’’گجرات میں مفت والے آتے ہیں اور چلے جاتے ہیں۔ ان لوگوں کو گجرات کے عوام نے بتایا ہے کہ گجرات دینے والا ہے، لینے والا نہیں۔ اسی وجہ سے گجرات کے لوگوں نے بی جے پی کو منتخب کیا ہے۔‘‘ ظاہر طور پر پرہلاد مودی کا یہ حملہ عآپ پر تھا جس نے گجرات اسمبلی انتخاب کے پیش نظر کئی مفت اسکیم کا وعدہ کیا تھا۔