پی آئی بی کے سینئر افسر کورونا پازیٹو، قومی میڈیا سنٹر بند

ہندوستان میں کورونا کے بڑھتے قہر کے درمیان صحافی طبقہ پر بھی اس کا اثر بڑھتا جا رہا ہے۔ تازہ ترین خبروں کے مطابق پریس انفارمیشن بیورو (پی آئی بی) کے ایک سینئر افسر کورونا وائرس انفیکشن کی زد میں آ گئے ہیں۔ اتوار کے روز افسر کی کورونا ٹیسٹ رپورٹ پازیٹو آنے کے بعد قومی میڈیا سنٹر (این ایم سی) کو بند کر دیا گیا ہے۔ بتایا جاتا ہے کہ میڈیا سنٹر کو سینیٹائزیشن کے بعد دوبارہ کھولا جائے گا۔ یہاں قابل ذکر ہے کہ کورونا پازیٹو سینئر پی آئی بی افسر نے مرکزی کابینہ وزراء کے ساتھ ایک پریس کانفرنس میں حصہ لیا تھا۔

ذرائع کے مطابق پی آئی بی کے اس سینئر افسر کو ایمس کے ٹراما سنٹر میں داخل کرایا گیا ہے۔ یہ ٹراما سنٹر کووڈ-19 کے علاج کے لیے مخصوص ہے۔ ذرائع نے یہ بھی کہا کہ این ایم سی، جہاں ان کا دفتر ہے، اسے فی الحال بند کر دیا گیا ہے اور یہ پیر کو بھی بند رہے گا۔ اس دوران پوری عمارت کی صاف صفائی کی جائے گی۔

یہ بھی بتایا جا رہا ہے کہ پریس کانفرنس سمیت پی آئی بی کی سبھی سرگرمیاں شاستری بھون میں تب تک نہیں ہوں گی جب تک کہ این ایم سی میں صاف صفائی کا کام مکمل نہیں ہو جاتا۔ ذرائع کا کہنا ہے کہ سینئر افسر نے پریس کانفرنس کے دوران کئی کابینہ وزراء کے ساتھ اسٹیج شیئر کیا ہے۔ انھوں نے کئی سینئر وزراء سے بھی ملاقات کی اور میٹنگوں میں حصہ لیا۔