پیپر لیک معاملہ: بی جے پی کی حلیف جماعتوں کے 2 ارکان اسمبلی سمیت 19 لوگوں کے خلاف ناقابل ضمانت وارنٹ جاری

اترپردیش میں پیر لیک کے ایک معاملے میں بی جے پی کی دو اتحادی پارٹیوں کے دو ارکان اسمبلی کے خلاف غیر ضمانتی وارنٹ جاری ہوا ہے۔ لکھنؤ کی اسپیشل گینگسٹر کورٹ نے سہیل دیو بھارتیہ سماج پارٹی کے رکن اسمبلی بیدی رام اور نشاد پارٹی کے ایم ایل اے وپل دوبے کے خلاف یہ وارنٹ جاری کیا ہے۔ پیپر لیک کا یہ معاملہ فروری 2006 کے ریلوے گروپ ڈی کے امتحان کے پیپر  لیک سے متعلق ہے۔

اس معاملے میں عدالت نے سہیل دیو بھارتیہ سماج پارٹی کے بیدی رام اور نشاد پارٹی کے ایم ایل اے وپل دوبے سمیت 19 لوگوں کے خلاف غیر ضمانتی وارنٹ جاری کیا ہے۔ ان 19 افراد میں بیدی رام، وپل دوبے، سنجے سریواستو، کرشن کمار، منوج کمار موریا، شیلیش کمار سنگھ، رام کرپال سنگھ، بھدر منی ترپاٹھی، آنند کمار سنگھ، کرشن کانت، دھرمیندر کمار، رمیش چندر پٹیل، محمد اسلم، اودھیش سنگھ، سشیل کمار اور اختر حسین کا نام شامل ہیں۔

ریلوے کے گروپ ڈی کے امتحان سے ایک دن پہلے سہیل دیو بھارتیہ سماج پارٹی کے ایم ایل اے بیدی رام سے پرچہ برآمد ہوا تھا۔ اس معاملے میں ایس ٹی ایف نے بیدی رام، وپل دوبے سمیت 16 لوگوں کو گرفتار کر کے جیل بھیج دیا تھا۔ 25 فروری 2006 کو ایس ٹی ایف نے عالم باغ علاقے سے ان کی گرفتاری کی تھی۔ اس معاملے میں ایس ٹی ایف نے کرشنا نگر تھانے میں گینگسٹر ایکٹ کے تحت مقدمہ بھی درج کرایا تھا۔ ایم ایل اے بیدی رام سمیت کل 19 ملزمین کے خلاف چارج شیٹ داخل ہوئی تھی۔

بیدی رام فی الوقت غازی پور کی جکھنیاں سیٹ سے ایم ایل اے ہیں۔ انہوں نے 2022 میں سہیل دیو بھارتیہ سماج پارٹی کے نشان پر اسمبلی انتخابات لڑا تھا۔ وہ سہیل دیو بھارتیہ سماج پارٹی کے قومی صدر اوم پرکاش راج بھر کے انتہائی قریبی لوگوں میں شمار کیے جاتے ہیں۔ سہیل دیو بھارتیہ سماج پارٹی کے ایم ایل اے بیدی رام کے خلاف کئی مجرمانہ معاملے درج ہیں۔ یوپی کے علاوہ راجستھان اور مدھیہ پردیش میں بھی ان کے خلاف مقدمات درج ہیں۔ اس کے ساتھ ہی نشاد پارٹی کے ایم ایل اے وپل دوبے بھدوہی کی گیان پور سیٹ سے ایم ایل اے ہیں۔ انہوں نے 2022 کے انتخابات میں سماجوادی پارٹی کے رام کشور بِند کو شکست دی تھی۔