6 لاکھ مریضوں کے لئے آکسیجن تیار رکھیں، ڈاکٹر پال کے پینل کا انتباہ

نیتی آیوگ کے رکن ڈاکٹر وی کے پال کی قیادت میں بنائے گئے پینل نے کہا ہے کہ ملک میں ہر روز 6 لاکھ مریضوں کو ذہن میں رکھتے ہوئے آکسیجن کا انتظام کیا جائے۔ واضح رہے اب سے ٹھیک دس ماہ پہلے ڈاکٹر پال کے پینل نے ہی وزارت صحت و خاندانی بہبود سمیت کئی افسران کو بتایا تھا کہ روزانہ تین لاکھ کورونا کے نئے معاملوں کو ذہن میں رکھتے ہوئے ہی آکسیجن کا انتظام کیا جائے۔

ڈاکٹر پال کی قیادت والے ’میڈیکل انفراسٹرکچر اور کووڈ مینجمنٹ پلان‘ نامی اس پینل نے پلان بی کے تحت آکسیجن کی فراہمی کو بڑھانے کی سفارش کی ہے۔ پینل نے کہا ہے کہ ایک دن میں 6 لاکھ مریضوں کے لئے آکسیجن کی فراہمی کا انتظام کر نا ہوگا۔

نیوز 18 پر شائع خبر کے مطابق اپریل کے پہلے ہفتہ میں ہوئی میٹنگ کے بعد ڈاکٹر پال کی قیادت والے اس پینل نے پلان بی کی سفارش کی تھی۔ واضح رہے وزارت صحت کی ایک پریس ریلیز میں ریاستوں کو کورونا کے بڑھتے معاملوں میں مینجمنٹ اور ضابطوں کو سختی سے لاگو کرنے کے لئے کہا تھا۔

واضح رہے اس پینل نے گزشتہ ستمبر میں کہا تھا کہ ایک دن میں تین لاکھ نئے معاملوں کے اضافہ کو پورا کرنے کے لئے 1.6 لاکھ آئی سی یو بیڈ اور 3.6 لاکھ غیر آئی سی یو بیڈ کی ضرورت ہے۔ یہ بھی کہا تھا کہ غیر آئی سی یو بیڈ میں 75 فیصد ایسے ہونے چاہیے جس میں آکسیجن کی سپلائی ہوسکے۔ موجودہ حالات سے صاف ظاہر ہے کہ حکومت نے ان سفارشات کو سنجیدگی سے نہیں لیا۔