یو پی میں دلتوں پر ظلم جاری، مٹکا سے پانی پینے پر دبنگوں نے کر دی پٹائی

ایک طرف اتر پردیش میں جرائم کے واقعات بڑھتے جا رہے ہیں، اور دوسری طرف دلتوں پر مظالم کا سلسلہ بھی رکنے کا نام نہیں لے رہا ہے۔ بندیل کھنڈ کے للت پور ضلع میں تین دبگوں نے ایک دلت نوجوان کو اس قدر پیٹا کہ اس کا ہاتھ ٹوٹ گیا۔ اس نوجوان کی غلطی صرف اتنی تھی کہ اسے پیاس لگی تو ملزمین کی دکان پر رکھے مٹکے سے پانی لے کر پی لیا۔ اس سے ناراض ملزمین نے نہ صرف اس دلت شخص کی پٹائی کی بلکہ اس کے تین گھر والوں کو بھی خوب پیٹا۔ اس تعلق سے پولس نے ایف آئی آر درج کر لی ہے اور تینوں ملزمین کی تلاش جاری ہے۔

میڈیا ذرائع کے مطابق تھانہ ناراہٹ کے گاؤں امریا باشندہ سنتوش اہیروار نے بتایا کہ وہ گزشتہ یکم نومبر کو منک کی دکان پر گیا تھا۔ وہاں اسے پیاس لگی تو اس نے جگ اٹھا کر دکان پر رکھے مٹکے سے پانی بھر کر پی لیا۔ اس سے ناراض ہو کر منک نے اپنے بیٹے پرکاش کے ساتھ مل کر اس سے گالی گلوچ اور مار پیٹ کی۔ الزام ہے کہ منک نے ذات پر مبنی الفاظ کا استعمال کیا اور اتنی پٹائی کی کہ سنتوش کا ہاتھ ٹوٹ گیا۔ اس کے بعد دبنگ اس کے گھر پہنچ گئے اور چچا، چچی سمیت گھر کے دیگر اراکین سے بھی مار پیٹ کی جس میں تین لوگ زخمی ہو گئے۔

پولس نے مظلوم کی شکایت پر منک، پرکاش اور شیر سنگھ پر سنگین دفعات کے تحت معاملہ درج کر لیا ہے اور تینوں کی تلاش شروع کر دی ہے۔ پولس سپرنٹنڈنٹ کیپٹن ایم ایم بیگ نے بتایا کہ دو فریق میں مار پیٹ ہوئی تھی اور ایک فریق کی شکایت پر تین لوگوں کے خلاف معاملہ درج کر لیا گیا ہے۔ ان کی گرفتاری کے لیے ٹیمیں تشکیل دے دی گئی ہیں۔