اپوزیشن اتحاد کا راستہ ہموار، حزب مخالف پارٹیوں کی عظیم الشان ریلی جلد، کھڑگے اور نتیش کی ملاقات کے بعد اعلان

اپوزیشن اتحاد کے لیے یکساں نظریہ والی پارٹیوں کے درمیان عام اتفاق کا خاکہ تقریباً تیار ہے۔ اس ضمن میں گزشتہ کچھ ہفتوں سے مختلف لیڈروں کے درمیان ملاقاتوں کا سلسلہ چل رہا ہے۔ اسی ضمن میں آج دہلی میں بہار کے وزیر اعلیٰ نتیش کمار اور کانگریس صدر ملکارجن کھڑگے کی ملاقات ہوئی۔ اس ملاقات کے بعد کانگریس جنرل سکریٹری کے وی سی وینوگوپال نے صحافیوں سے بات چیت کرتے ہوئے کہا کہ حزب مخالف پارٹیوں کے درمیان ایک طرح سے اتفاق قائم ہو گیا ہے اور جلد ہی ان سبھی پارٹیوں کی ایک ریلی یا میٹنگ منعقد کی جائے گی۔ انھوں نے مزید کہا کہ اس کی تاریخ اور وقت کا اعلان ایک دو دن میں کیا جائت گا۔ ساتھ ہی یہ بھی اعلان ہوگا کہ اس میں کون کون سے لیڈران حصہ لینے والے ہیں۔ انھوں نے کہا کہ اس میں بڑی تعداد میں اپوزیشن پارٹیاں شامل ہوں گی۔

22 مئی کو کانگریس صدر ملکارجن کھڑگے اور نتیش کمار کے درمیان ہوئی میٹنگ کے دوران سابق کانگریس صدر راہل گاندھی بھی موجود تھے۔ کانگریس نے اپنے آفیشیل ٹوئٹر ہینڈل سے اس ملاقات کی چھوٹی سی ویڈیو شیئر کی ہے۔ اس ویڈیو میں نتیش کمار اپنی بات ملکارجن کھڑگے اور راہل گاندھی کے سامنے رکھتے ہوئے دکھائی دے رہے ہیں۔

کانگریس صدر ملکارجن کھڑگے نے بھی اس ملاقات کی ویڈیو کو شیئر کیا ہے۔ اس کے ساتھ انھوں نے لکھا ہے "اب متحد ہوگا ملک۔ جمہوریت کی مضبوطی ہی ہمارا پیغام۔" ساتھ ہی انھوں نے لکھا ہے کہ "راہل گاندھی اور ہم نے آج بہار کے وزیر اعلیٰ نتیش کمار کے ساتھ موجودہ سیاسی حالات پر تبادلہ خیال کر ملک کو ایک نئی سمت دینے کے عمل کو آگے بڑھایا۔"

واضح رہے کہ اس سے قبل نتیش کمار نے 21 مئی کو دہلی کے وزیر اعلیٰ اروند کیجریوال سے ملاقات کی تھی۔ نتیش کمار دراصل گزشتہ تقریباً دو ماہ سے مختلف حزب مخالف پارٹیوں سے ملاقات کر رہے ہیں۔ گزشتہ ماہ ہی انھوں نے سب سے پہلے کانگریس صدر کھڑگے سے ملاقات کی تھی، اور پھر اس کے بعد کچھ ریاستوں کے وزرائے اعلیٰ سے ان کی ملاقات ہوئی تھی۔ ذرائع کا کہنا ہے کہ کانگریس کی طرف سے اپوزیشن اتحاد کا اشارہ ملنے کے بعد ہی نتیش کمار نے اپوزیشن پارٹیوں کے لیڈران سے ملاقات کا دور شروع کیا تھا۔

واضح رہے کہ اب تک نتیش کمار مغربی بنگال کی وزیر اعلیٰ ممتا بنرجی، اتر پردیش کے سابق وزیر اعلیٰ اور سماجوادی پارٹی چیف اکھلیش یادو، اڈیشہ کے وزیر اعلیٰ نوین پٹنایک اور جھارکھنڈ کے وزیر اعلیٰ ہیمنت سورین وغیرہ سے ملاقات کر چکے ہیں۔ انھوں نے این سی پی چیف شرد پوار اور شیوسینا چیف ادھو ٹھاکرے سے بھی رواں ماہ کے دوسرے عشرے میں ملاقات کی تھی۔